Իսրայելական ուժերը ոչնչացրել են 30 բնակելի շենք Գազայում

Իսրայելական ուժերը ոչնչացրել են Գազա քաղաքում գտնվող առնվազն 30 բնակելի շենքեր և հարկադրել են հազարավոր մարդկանց լքել իրենց տները, հայտնել են պաղեստինյան պաշտոնյաները, երբ ԱՄՆ-ի արտաքին գործերի նախարար Մարկո Ռուբիոն կիրակի օրը ժամանել է քննարկելու հակամարտության ապագան: Այդ մասին հայտնում է Reuters-ը։

Իսրայելը հայտարարել է, որ ծրագրում է գրավել քաղաքը, որտեղ ապաստանել են մոտ մեկ միլիոն պաղեստինցիներ, որպես իր հայտարարած նպատակի մաս՝ վերացնել ՀԱՄԱՍ-ի ենթակառուցվածքները։ ՀԱՄԱՍ-ի քաղաքական ղեկավարությունը, որը մասնակցել է հնարավոր զինադադարի և գերեվարված անձանց ազատ արձակման գործարքի վերաբերյալ բանակցություններին, Իսրայելի կողմից թիրախավորվել է Դոհայում սեպտեմբերի 9-ին կատարված օդային հարվածի ժամանակ:

Ռուբիոն ասել է, որ Վաշինգտոնը ցանկանում է խոսել Գազայի հատվածում ՀԱՄԱՍ-ի կողմից դեռևս պահվող 48 գերեվարված անձանց ազատ արձակման և ափամերձ հատվածի վերակառուցման մասին: Միայն 20-ը ենթադրվում է, որ ողջ են: «Ինչ պատահել է, արդեն պատահել է», - ասել է նա:

«Մենք կհանդիպենք նրանց հետ (Իսրայելի ղեկավարությունը): Մենք կխոսենք ապագայի մասին», - ասել է Ռուբիոն Իսրայել մեկնելուց առաջ, որտեղ նա կմնա մինչև սեպտեմբերի 16-ը: Ժամանելով՝ Ռուբիոն այցելել է Երուսաղեմի արևմտյան պատ, հրեական ամենահոգեհարազատ աղոթքի վայրը: Արևմտյան պատ այցը «վերահաստատում է ԱՄՆ կողմից Երուսաղեմի ճանաչումը, որպես Իսրայելի հավերժ մայրաքաղաք», ընդգծել են Պետդեպարտամենտից:

2017 թվականի վերջին, իր առաջին նախագահական ժամկետի ընթացքում, Դոնալդ Թրամփը պաշտոնապես ճանաչել է Երուսաղեմը որպես Իսրայելի մայրաքաղաք և հետագայում տեղափոխել ԱՄՆ դեսպանատունը Թել Ավիվից:

Իսրայելը ասել է, որ անցյալ շաբաթ ավարտել է Գազա քաղաքի վրա օդային հարվածների հինգ ալիք, թիրախավորելով ավելի քան 500 կայանք, այդ թվում՝ ՀԱՄԱՍ-ի հետախուզական և նշանառու կայանքներ, թունելների բացվածքներ պարունակող շենքեր և զենքի պահեստներ:

ՀԱՄԱՍ-ը ասել է, որ օգոստոսի 11-ից ի վեր իսրայելական ուժերը ոչնչացրել են առնվազն 1600 բնակելի շենքեր և 13,000 վրաններ: Ըստ իսրայելական աղբյուրների՝ սեպտեմբերի 14-ի դրությամբ Գազայից դուրս եկողների թիվը հասել է 300 հազարի։