Գազայից հետո Թրամփը կզբաղվի Ուկրաինայի հարցով

Միացյալ Նահանգների նախագահ Դոնալդ Թրամփը, արձանագրելով արտաքին քաղաքական խոշոր հաղթանակ Գազայի հատվածում, որտեղ նրա միջնորդությամբ ազատ արձակվեցին գերիներ և դադարեցվեցին ռազմական գործողությունները Իսրայելի ու ՀԱՄԱՍ-ի միջև, իր ուշադրությունը սևեռում է Ուկրաինայի վրա։ Իսրայել և Եգիպտոս կատարած այցերի ընթացքում նա հայտարարել է, որ մտադիր է խաղաղության հասնել նաև այդտեղ։

Ամերիկացի և եվրոպացի պաշտոնյաները գիտակցում են, որ իրավիճակները Մերձավոր Արևելքում և Ուկրաինայում տարբեր են։ Եթե Իսրայելն իր տարածաշրջանում գերիշխող ռազմական ուժ է, ապա Եվրոպայում այդ դիրքը դեռևս պահպանում է Ռուսաստանի Դաշնությունը։ Այնուամենայնիվ, նրանք հույս ունեն, որ ԱՄՆ նախագահը կկարողանա օգտագործել դիվանագիտական հաղթանակի պահը և ճիշտ դասեր քաղել Գազայի պատերազմից։

Հիշեցնենք, որ Դոհայում ՀԱՄԱՍ-ի զինյալների ուղղությամբ Իսրայելի օդային հարվածից հետո Թրամփը ճնշում գործադրեց վարչապետ Բենիամին Նեթանյահուի վրա՝ ստիպելով նրան ընդունել 20 կետից բաղկացած խաղաղության ծրագիրը և հրապարակավ ներողություն խնդրել Կատարի ղեկավարից։ Իրենց հերթին, Կատարը, Եգիպտոսը և Թուրքիան ուժեղացրին ճնշումը ՀԱՄԱՍ-ի վրա՝ սպառնալով խզել դիվանագիտական կապի ուղիները, եթե խմբավորումը չընդունի առաջարկված խաղաղության ծրագիրը։ Այս ամենը տեղի էր ունենում Գազայում Իսրայելի ռազմական գործողություններին զուգահեռ։

Թրամփը դեռևս նույնատիպ ճնշում չի գործադրել Պուտինի վրա։ Ուկրաինան և նրա եվրոպացի դաշնակիցները հույս ունեն, որ իրավիճակը կփոխվի այժմ, երբ Թրամփը տեսավ Մերձավոր Արևելքում որպես բանակցող իր հաջողության պտուղները, և քանի որ ամիսներ տևած անհաջող բանակցությունների ֆոնին աճում է նրա անհամբերությունը Ռուսաստանի նկատմամբ։ Նա դեռևս նոր պատժամիջոցներ չի սահմանել Ռուսաստանի դեմ, ինչը չափազանց կարևոր է, քանի որ վերջինիս տնտեսությունը գտնվում է ճգնաժամի եզրին։ Ուկրաինան նաև խնդրում է «Tomahawk» հրթիռներ, ինչն էլ ավելի կուժեղացնի ճնշումը Ռուսաստանի Դաշնության վրա։

Սակայն կա ևս մեկ գործոն, որը բացակայում էր Մերձավոր Արևելքում՝ Չինաստանը, որը Ռուսաստանի համար դարձել է կարևորագույն տնտեսական և քաղաքական հենարան։ Տարբեր երկրների պաշտոնյաներ կարծում են, որ Ռուսաստանի աճող կախվածությունը Չինաստանից նշանակում է, որ Պեկինը կարող է արդյունավետ դեր խաղալ՝ Պուտինին խաղաղության ցանկացած համաձայնագրի բերելու հարցում։ Սակայն դեռ բաց է հարցը՝ արդյո՞ք Թրամփին կհաջողվի համոզել Չինաստանին գնալ այդ քայլին։ Այս պահին Վաշինգտոն-Պեկին հարաբերությունները դեռ մնում են բավական լարված։