Մշակվել է Ուկրաինայի պաշտպանության եռաստիճան պլան

Ուկրաինայի դաշնակիցները երկրի պաշտպանության նախնական պլան են կազմել Ռուսաստանի հետ խաղաղության համաձայնագրի կնքման դեպքում, հայտնում է բրիտանական Financial Times պարբերականը՝ հղում անելով աղբյուրներին։ Պլանը նախատեսում է Ուկրաինայի պաշտպանության երեք գիծ․

Առաջինը՝ ապառազմականացված գոտի, որը կարող են պարեկել երրորդ երկրների խաղաղապահները, որոնց ցանկը կհամաձայնեցնեն Ռուսաստանն ու Ուկրաինան։

Երկրորդը՝ «շատ ավելի կայուն սահման», որը կպաշտպանեն ՆԱՏՕ-ի ուժերի կողմից զինված և մարզված ուկրաինացի զինվորականները։

Պաշտպանության երրորդ գիծը կլինի Ուկրաինայի խորքում։ Այնտեղ, ըստ պլանի, կտեղակայվեն եվրոպական ուժեր, իսկ ամերիկյանները նրանց կաջակցեն թիկունքից, նշում է FT-ն։

Ըստ պարբերականի՝ եվրոպացի պաշտոնյաները մասնավոր զրույցներում խոստովանել են, որ պատրաստ են Ուկրաինայում ուժեր տեղակայել միայն ԱՄՆ-ի աջակցության պայմանով։

FT-ին բանակցությունների ընթացքին ծանոթ չորս աղբյուրներ հայտնել են, որ Վաշինգտոնը պատրաստ է տրամադրել «ռազմավարական միջոցներ»՝ ներառյալ հետախուզություն, դիտարկում, ինչպես նաև ՀՕՊ միջոցներ՝ Եվրոպայի ղեկավարությամբ տեղում տեղակայված ցանկացած ուժերին աջակցելու համար։