Լեկորնյուն մնաց վարչապետ․ զոհաբերեցին Մակրոնի կենսաթոշակային բարեփոխումը

Ֆրանսիայի վարչապետ Սեբաստիեն Լեկորնյուի նոր կառավարությունը դիմակայեց քաղաքական ճգնաժամին՝ խորհրդարանում տապալելով իր դեմ ներկայացված անվստահության երկու նախաձեռնությունները։ Այս փխրուն հաղթանակը ձեռք բերվեց մեծ զիջման գնով. Լեկորնյուն ստիպված եղավ սառեցնել նախագահ Էմանուել Մակրոնի ամենախորհրդանշական և վիճահարույց բարեփոխումը՝ կենսաթոշակային տարիքի բարձրացումը։

Կառավարության համար իրական սպառնալիք էր ներկայացնում արմատական ձախ «Աննկուն Ֆրանսիա» կուսակցության նախաձեռնած անվստահության քվեն, որին միացել էին ընդդիմության այլ ուժեր, այդ թվում՝ Մարին Լը Պենի ծայրահեղ աջ «Ազգային միավորումը»։ Կառավարությունը պաշտոնանկ անելու համար անհրաժեշտ էր 289 ձայն, սակայն ընդդիմությանը հաջողվեց հավաքել միայն 271 ձայն՝ պակասեց ընդամենը 18-ը։ Լը Պենի կուսակցության ներկայացրած մյուս նախաձեռնությունն ավելի մեծ տարբերությամբ տապալվեց։

Կառավարության փրկության բանալին դարձավ Լեկորնյուի արած զիջումը սոցիալիստներին։ Երկու օր առաջ նա խորհրդարանում հայտարարեց, որ կասեցնում է կենսաթոշակային տարիքը 62-ից 64 բարձրացնելու բարեփոխումը մինչև 2027 թվականի նախագահական ընտրությունները։ Սա բավարար եղավ, որպեսզի սոցիալիստների մեծամասնությունը չաջակցի անվստահության քվեին, ինչը զայրացրեց նրանց արմատական ձախ դաշնակիցներին։

Այժմ Լեկորնյուի առջև ծառացած է գլխավոր մարտահրավերը՝ խորհրդարանով անցկացնել 2026 թվականի պետական բյուջեն։ Քանի որ ոչ մի կուսակցություն բացարձակ մեծամասնություն չունի, վարչապետը ստիպված կլինի յուրաքանչյուր որոշման համար ժամանակավոր դաշինքներ կնքել տարբեր քաղաքական ուժերի հետ։ Բյուջեն հավասարակշռելու համար կպահանջվեն սոցիալական ծախսերի կրճատումներ, ինչը միայն կավելացնի նրա հանդեպ դժգոհությունը։

Ֆրանսիական հասարակությունը ևս բևեռացված է։ Հարցումները ցույց են տալիս, որ մարդկանց մեծամասնությունը (56%) ձգտում է կայունության և դեմ է կառավարության հրաժարականին, իսկ 58%-ը ողջունում է կենսաթոշակային բարեփոխման կասեցումը։ Սակայն, միևնույն ժամանակ, հարցվածների 62%-ը դեմ է Լեկորնյուի վերանշանակմանը։