Ֆրանսիան հզորացնում է միջուկային զինանոցը. շահագործման է հանձնվել նոր հրթիռ

Ֆրանսիան զգալիորեն ամրապնդում է իր ռազմական կարողությունները՝ սպառազինության մեջ ընդունելով միջուկային լիցք կրելու ունակ ASMPA-R նոր հրթիռը։ Այդ մասին հայտնել է երկրի պաշտպանության նախարարությունը՝ Rafale կործանիչից հրթիռի երկրորդ հաջող փորձարկումից հետո։

ASMPA-R հրթիռը «օդ-երկիր» դասի միջին հեռահարության զենք է։ Ինչպես նշվում է ռազմական գերատեսչության հաղորդագրության մեջ, այն պաշտոնապես ընդունվել է ռազմածովային ուժերի ատոմային օդուժի (FANU) սպառազինություն նոյեմբերի 10-ից։

Սա Ֆրանսիայի միջուկային զսպման համակարգի արդիականացման միակ քայլը չէ։ Հոկտեմբերի վերջին նախարարությունը հայտարարել էր նաև M51.3 նոր միջմայրցամաքային բալիստիկ հրթիռների ընդունման մասին։ Դրանք կտեղակայվեն Triomphant դասի ատոմային սուզանավերի վրա։