Ֆրանսիայի վարչապետ հրաժարականի դիմում է ներկայացրել նախագահին

Ֆրանսիան շարունակում է գտնվել քաղաքական խորը ճգնաժամի մեջ։ Նախագահ Էմանուել Մակրոնի՝ նոր կառավարություն ձևավորելու և երկիրը քաղաքական փակուղուց դուրս բերելու փորձը տապալվեց՝ հազիվ սկսված։ Վարչապետ նշանակված Սեբաստիեն Լեկորնուն, ով դարձել էր Մակրոնի օրոք յոթերորդ վարչապետը, նշանակումից գրեթե անմիջապես հետո հրաժարականի դիմում է ներկայացրել, որն ընդունվել է նախագահի կողմից։

Այս քայլը տեղի է ունեցել այն բանից հետո, երբ հայտարարվեց նոր կառավարության կազմը, որի ձևավորումը տևել էր գրեթե մեկ ամիս։ Այնուամենայնիվ, ակնհայտ էր, որ նորանշանակ վարչապետը կանգնած է տապալման իրական վտանգի առաջ՝ խորհրդարանում առկա խորը պառակտվածության պայմաններում։ Մի քանի ձախակողմյան կուսակցություններ արդեն իսկ սպառնացել էին անվստահություն հայտնել Լեկորնուին, ով երեքշաբթի օրը պետք է ելույթ ունենար խորհրդարանում։

Քաղաքական այս փակուղին սկիզբ առավ անցյալ տարվա կեսերին, երբ Մակրոնը, հույս ունենալով ամրապնդել իր իշխանությունը, խաղադրույք կատարեց արտահերթ ընտրությունների վրա։ Այս քայլը, սակայն, հակառակ արդյունք տվեց՝ ընտրողները ձևավորեցին մի խորհրդարան, որը բաժանված էր երեք հիմնական մրցակցող բլոկների միջև, ինչը գրեթե անհնարին դարձրեց կայուն կառավարության ձևավորումը։ Լեկորնուի երկու անմիջական նախորդները՝ Ֆրանսուա Բայրուն և Միշել Բարնիեն, նույնպես պաշտոնանկ արվեցին բյուջետային խնայողությունների շուրջ ծագած օրենսդրական առճակատումների հետևանքով։

Նոր, սակայն կարճատև կառավարության կազմում մի քանի առանցքային նախարարներ պահպանել էին իրենց պաշտոնները։ Ներքին գործերի նախարար Բրունո Ռետայոն, արտաքին գործերի նախարար Ժան-Նոել Բառոն և արդարադատության նախարար Ժերալդ Դարմանենը մնացել էին իրենց տեղերում։ Իր պաշտոնը պահպանել էր նաև մշակույթի սկանդալային նախարար Ռաշիդա Դատին, ով հաջորդ տարի կկանգնի դատարանի առաջ կոռուպցիայի մեղադրանքով։ Ամենանշանակալի փոփոխությունը 2017-ից 2024 թվականներին էկոնոմիկայի նախարարի պաշտոնը զբաղեցրած Բրունո Լը Մերի նշանակումն էր պաշտպանության նախարարի պաշտոնում։ Էկոնոմիկայի նախարար էր նշանակվել Ռոլան Լեսքյուրը։

Վարչապետի հրաժարականը ցույց է տալիս, որ Ֆրանսիայում քաղաքական ճգնաժամը շարունակվում է, և երկրի կառավարումը մնում է խիստ անկայուն։