Ռուսաստանը հիբրիդային պատերազմ է մղում ԵՄ դեմ․ Ֆոն դեր Լայեն

Եվրահանձնաժողովի նախագահ Ուրսուլա ֆոն դեր Լայենը հանդես է եկել աննախադեպ կոշտ հայտարարությամբ՝ Ռուսաստանին մեղադրելով Եվրամիության դեմ համակարգված և սրվող հիբրիդային պատերազմ վարելու մեջ։ Եվրախորհրդարանում ունեցած իր ելույթում նա կոչ է արել եվրոպական երկրներին «արթնանալ» և ընդունել նոր իրողությունը՝ նախազգուշացնելով վտանգավոր զարգացումների մասին։

«Մեր երկնքում տեղի է ունենում ինչ-որ նոր և վտանգավոր բան», - հայտարարել է ֆոն դեր Լայենը՝ ներկայացնելով վերջին շրջանում տեղի ունեցած միջադեպերի խոսուն շարքը։ «Միայն վերջին երկու շաբաթվա ընթացքում ՄԻԳ կործանիչները խախտել են Էստոնիայի օդային տարածքը, իսկ անօդաչու սարքերը թռիչքներ են կատարել Բելգիայի, Լեհաստանի, Ռումինիայի, Դանիայի և Գերմանիայի կարևորագույն օբյեկտների վրայով։ Ավիաչվերթները դադարեցվել են, օդ են բարձրացվել կործանիչներ, կիրառվել են հակազդման միջոցներ»։

Ըստ Եվրահանձնաժողովի նախագահի՝ այս գործողությունները, որոնք ներառում են նաև GPS ազդանշանների խլացում և կիբերհարձակումներ, պատահական միջադեպեր չեն։ «Սա հետևողական և աճող արշավ է, որի նպատակն է պառակտել մեր Միությունը և թուլացնել աջակցությունն Ուկրաինային։ Եվ ժամանակն է ամեն ինչ իր անունով կոչել։ Սա հիբրիդային պատերազմ է», - ընդգծել է նա։

Ի պատասխան այս մարտահրավերների՝ Եվրամիությունը պատրաստում է «Պահպանենք խաղաղությունը.

Պատրաստվածության ճանապարհային քարտեզ 2030» համապարփակ ծրագիրը։ Այն նախատեսում է մի շարք հավակնոտ նախաձեռնություններ, այդ թվում՝ «Անօդաչուների պատի» ստեղծում, «Արևելյան դետք» նախագծի իրականացում և պաշտպանական կարևորագույն ուղղությունների զարգացում՝ սկսած հակաօդային պաշտպանությունից մինչև կիբերանվտանգություն։