Ֆինլանդիան արգելել է ռուսներին և բելառուսներին գույք գնել

Հուլիսի 15-ից Ֆինլանդիան արգելել է անշարժ գույքի հետ կապված գործարքները Ռուսաստանի և Բելառուսի քաղաքացիների համար: Այդ մասին հուլիսի 15-ին հայտարարել է Ֆինլանդիայի պաշտպանության նախարար Անտտի Հյակկյանենը:

«Ռուսաստանի և Բելառուսի քաղաքացիների կողմից անշարժ գույքի հետ գործարքների իրականացման արգելքը ուժի մեջ է մտնում այսօր՝ հուլիսի 15-ին», - գրել է Հյակկյանենը X սոցիալական ցանցում:

Ֆինլանդիայի խորհրդարանը ապրիլին հավանություն է տվել օրինագծին, որն արգելում է ռուսաստանցիներին գործարքներ կատարել անշարժ գույքի հետ: Ըստ օրինագծի՝ անշարժ գույք ձեռք բերելու թույլտվություն չի տրվի այն անձին, ում քաղաքացիության երկիրը, ենթադրաբար, կարող է սպառնալիք ներկայացնել Ֆինլանդիայի ազգային անվտանգության համար: Հետագայում իշխանությունները Բելառուսը նույնպես ավելացրել են այն երկրների ցանկում, որոնց քաղաքացիներին պետք է արգելվի անշարժ գույքի հետ գործարքներ կատարել Ֆինլանդիայում:

Ֆինլանդիայի իրավական համակարգում անշարժ գույքը ներառում է հողամասեր, սակայն բազմաբնակարան շենքերի բնակարանները դրան չեն պատկանում: Ինչպես ավելի վաղ հստակեցրել էր պաշտպանության նախարարությունը, անշարժ գույքի հետ գործարքների արգելքը կկիրառվի նաև այն անձանց նկատմամբ, ովքեր ունեն իրավաբանական հասցե այնպիսի պետության տարածքում, որը «սպառնալիք է ներկայացնում» Ֆինլանդիայի անվտանգության համար։