Ի՞նչ նախապայմաններ ունի Թուրքիան՝ՀՀ-ի հետ հարաբերությունները կարգավորելուց առաջ

Թուրքիան պատրաստ է կարգավորել հարաբերությունները և բացել սահմանը Հայաստանի հետ միայն այն բանից հետո, երբ Երևանի և Բաքվի միջև կստորագրվի վերջնական խաղաղության պայմանագիր։ Այս մասին հայտարարել է Թուրքիայի արտգործնախարար Հաքան Ֆիդանը՝ հստակեցնելով Անկարայի պաշտոնական նախապայմանը։ Սա այն դեպքում, որ, ըստ նախկին հայտարարությունների, Հայաստան-Թուրքիա կարգավորման գործընթացն ընթանում է առանց նախապայմանների։

«Երբ Ադրբեջանն ու Հայաստանը ստորագրեն խաղաղության պայմանագիր, մենք պատրաստ կլինենք հարաբերությունների կարգավորմանը Երևանի հետ», - ասել է Ֆիդանը Haber Global-ին տված հարցազրույցում։

Թուրքիայի ԱԳ նախարարը նաև ընդգծել է երկու այլ հարց՝ Հայաստանի Սահմանադրության փոփոխությունը և Հայաստանի հարավով անցնող հաղորդակցային ուղիների հարցը։

Նա նշել է, որ այս հարցերը «տեղ չեն գտել օգոստոսի 8-ին Վաշինգտոնում Երևանի ու Բաքվի միջև խաղաղության պայմանագրի նախաստորագրված տեքստում»՝ անտեսելով իր հայ գործընկեր Արարատ Միրզոյանի պարզաբանումները, թե հայկական կողմը Սահմանադրությունը փոխելու պարտավորություն չի ստանձնել։

Ֆիդանը նաև պարզաբանել է, թե ինչու է Թուրքիան կապում երկու գործընթացները միմյանց հետ։ Նրա խոսքով՝ Անկարան չի շտապում հենց հիմա կարգավորել հարաբերությունները Հայաստանի հետ, քանի որ դա Երևանին կզրկի Բաքվի հետ վերջնական խաղաղության պայմանագիր կնքելու հիմնական շարժառիթից։