ԵԽ-ն պատրաստ է աջակցել ՀՀ-ի՝ ԵՄ անդամակցությանը

Եվրոպական խորհրդարանը հստակ և աներկբա ուղերձ է հղում՝ հայտարարելով իր պատրաստակամությունը՝ աջակցելու Հայաստանին Եվրոպական միությանն անդամակցելու գործընթացում։ Այս կարևոր հայտարարությունը հնչել է Երևանում անցկացվող Եվրանեսթ խորհրդարանական վեհաժողովի 12-րդ լիագումար նիստի ընթացքում՝ Եվրոպական խորհրդարանի փոխնախագահ Յունուս Օմարջիի կողմից։ Նա ելույթ էր ունենում Եվրախորհրդարանի նախագահ Ռոբերտա Մեցոլայի անունից։

Իր ելույթում Օմարջին ընդգծել է, որ Հայաստանի կողմից վերջին շրջանում ընդունված որոշումները վկայում են երկրի հստակ քաղաքական կամքի և եվրոպական ընտանիքին միանալու ձգտման մասին։ Նա հատուկ անդրադարձել է 2025 թվականի մարտին Հայաստանի խորհրդարանի կողմից ընդունված օրենքին, որով մեկնարկ է տրվում ԵՄ-ին անդամակցելու գործընթացին։

«Հայաստանի որոշումները, հատկապես վերջերս ընդունվածները, չափազանց կարևոր են։ Հայաստանը պատմական օրենք է ընդունել, որով հստակ և հզոր ուղերձ է հղել՝ հայտարարելով, որ տեսնում է իր ապագան Եվրոպայի կազմում։ Սա պարզապես խորհրդանշական ժեստ չէ, այլ ռազմավարական ընտրություն է՝ միանալու Եվրոպական ժողովրդավարության ընտանիքին», - հայտարարեց Եվրախորհրդարանի փոխնախագահը։

Նա վերահաստատել է Եվրոպական խորհրդարանի հանձնառությունը՝ լինելու Հայաստանի կողքին այս ճանապարհին։ «Եվրոպական խորհրդարանը պատրաստ է աջակցել Հայաստանին այս պատմական ճանապարհին, եթե որոշեք պաշտոնապես ներկայացնել ձեր թեկնածությունը ԵՄ անդամակցության համար», - ասել է Օմարջին՝ հստակեցնելով, որ աջակցությունը կլինի շոշափելի և հետևողական։ Յունուս Օմարջին շեշտել է, որ Հայաստանի եվրոպական ուղղությունը ամրապնդվում է ԵՄ-ի և Հայաստանի միջև արդեն իսկ ձևավորված գործնական և շոշափելի համագործակցությամբ։ Նա առանձնացրել է տնտեսական ոլորտը և Արևելյան գործընկերության ներդրումային ծրագրերը՝ որպես այս գործընկերության վառ օրինակներ։

«Բացի քաղաքական հայտարարություններից, կա նաև իրական, շոշափելի գործընկերություն՝ հատկապես տնտեսության և Արևելյան գործընկերության ներդրումային ծրագրերի շրջանակում։ Մենք մեր ջանքերը մեկտեղում ենք՝ ստեղծելու նոր աշխատատեղեր, ժամանակակից ենթակառուցվածքներ և նոր հնարավորություններ երիտասարդ հայերի համար», - նշել է նա։

Եվրախորհրդարանի փոխնախագահը լավատեսություն է հայտնել ապագայի վերաբերյալ՝ ընդգծելով, որ համատեղ ջանքերով հնարավոր է հասնել զգալի արդյունքների։ «Երբ Եվրոպական միությունը և Հայաստանը միասին են առաջ շարժվում, կարող են կերտել ավելի բարգավաճ և արդար ապագա բոլորի համար», - ընդգծել է Օմարջին՝ վերահաստատելով Եվրոպայի դռները Հայաստանի առջև բաց պահելու պատրաստակամությունը։