ԵՄ-ն մշակում է Ուկրաինայի խաղաղության իր ծրագիրը

Եվրոպական միությունը սկսել է Ուկրաինայում պատերազմի ավարտի իր սեփական ծրագրի մշակումը՝ ի պատասխան ԱՄՆ-ի կողմից ներկայացված առաջարկների, որոնք Բրյուսելում որակվել են որպես «վատ գործարք» Կիևի համար և Պուտինի պահանջների բավարարում։ Այս մասին հայտնում է The Wall Street Journal-ը՝ վկայակոչելով եվրոպացի պաշտոնյաների։

Ըստ եվրոպական կողմի՝ Վաշինգտոնի մշակած ծրագիրը, որը նախատեսում է տարածքային և ռազմական զիջումներ Ուկրաինայի կողմից, անընդունելի է։ ԵՄ պաշտոնյաներն ու դիվանագետները խորը դժգոհություն են հայտնել Վաշինգտոնի մոտեցման կտրուկ փոփոխության վերաբերյալ։ Politico-ի հետ զրույցում ԵՄ դիվանագետներից մեկը նշել է. «Իհարկե, սա մտահոգիչ է, բայց մենք պետք է հավատարիմ մնանք մեր դիրքորոշմանը»։ Նրա խոսքով՝ «Եթե Ռուսաստանը խուսափի պատասխանատվությունից, միայն ժամանակի հարց է, թե երբ կտեսնենք նոր ագրեսիա ոչ միայն Ուկրաինայի, այլև ԵՄ և ՆԱՏՕ անդամ պետությունների դեմ»։ Մեկ այլ բարձրաստիճան պաշտոնյա ամերիկյան ծրագիրը պարզապես «Պուտինին բավարարելու կետերի» ցանկ է անվանել։

Ի պատասխան այս զարգացումների՝ եվրոպական առաջնորդները փորձում են համախմբվել։ Գերմանիայի կանցլեր Ֆրիդրիխ Մերցը, ըստ գերմանացի պաշտոնյայի, «ինտենսիվորեն» աշխատում է եվրոպական միասնական արձագանքը համակարգելու ուղղությամբ, որը թույլ կտա Ուկրաինային առաջարկել խաղաղության համաձայնագրի ավելի արդար և ընդունելի պայմաններ։ Եվրոպան հույս ունի մի քանի օրվա ընթացքում պատրաստել խաղաղ պայմանավորվածությունների իր սեփական տարբերակը։

Եվրոպացի պաշտոնյաները նաև պնդում են, որ ԱՄՆ-ն իր ծրագիրը մշակելիս չի խորհրդակցել իրենց հետ, իսկ Ուկրաինան նույնպես մեծ մասամբ անտեսվել է։ Սա հակասում է ամերիկյան կողմի պնդումներին։ Սպիտակ տան մամուլի քարտուղար Քերոլայն Լիվիթը հայտարարել է, որ Ուկրաինայի ազգային անվտանգության և պաշտպանության խորհրդի քարտուղար Ռուստեմ Ումերովը հավանություն է տվել «ծրագրի մեծ մասին»։ Սակայն, ըստ WSJ-ի, Ումերովին դրա մասին տեղեկացրել են միայն վերջին օրերին, ինչը կասկածի տակ է դնում լիարժեք համակարգման փաստը։