ԵԽ նախագահը փորձում է շրջանցել Օրբանի վետոն Ուկրաինայի անդամակցության հարցում

ԵԽ նախագահ Անտոնիու Կոշտան նախաձեռնել է Ուկրաինայի՝ Եվրամիությանն անդամակցելու գործընթացն առաջ մղելու ծրագիր՝ փորձելով շրջանցել Հունգարիայի կողմից կիրառվող վետոն։ Ըստ Politico-ի՝ Կոշտան փորձում է ԵՄ մայրաքաղաքների աջակցությունը ստանալ՝ նոր անդամների ընդունման գործընթացը պարզեցնելու և Ուկրաինայի ու Մոլդովայի անդամակցության շուրջ ստեղծված փակուղուց դուրս գալու համար։

Ներկայիս կանոնների համաձայն՝ անդամակցության բանակցությունների յուրաքանչյուր փուլի մեկնարկի համար պահանջվում է ԵՄ բոլոր 27 անդամ երկրների միաձայն համաձայնությունը։ Հունգարիայի վարչապետ Վիկտոր Օրբանը, սակայն, հետևողականորեն օգտագործում է իր վետոյի իրավունքը՝ արգելափակելով Ուկրաինայի առաջընթացը։

Այս խոչընդոտը հաղթահարելու համար Կոշտան առաջարկում է փոխել որոշումների կայացման կարգը։ Ըստ նրա առաջարկի՝ այսպես կոչված «բանակցային կլաստերները» (անդամակցությանն ուղղված հիմնական իրավական քայլերը) կարող են բացվել ոչ թե միաձայնությամբ, այլ ԵՄ երկրների որակյալ մեծամասնության համաձայնությամբ։ Սակայն կլաստերի փակման համար, ինչպես և նախկինում, կպահանջվի բոլոր անդամ երկրների աջակցությունը։

Այս փոփոխությունը թույլ կտա Ուկրաինային և Մոլդովային սկսել բարեփոխումների գործընթացը՝ առանց Հունգարիայի կողմից արգելափակվելու ռիսկի։ Այսպիսով, Եվրոպական խորհրդի նախագահը փորձում է դիվանագիտական ճանապարհով մեկուսացնել Օրբանին և կանխել ԵՄ ընդլայնման գործընթացի հետագա ձգձգումը՝ հատկապես Կոպենհագենում կայանալիք կարևոր գագաթնաժողովի նախաշեմին։