ԵՄ-ն պատրաստ է Ադրբեջանին աջակցել խաղաղությունից հետո

Հայաստանի և Ադրբեջանի միջև խաղաղության համաձայնագրի նախաստորագրումից հետո Հարավային Կովկասի տարածաշրջանը խորը փոփոխությունների է ենթարկվում, և այս պատմական պահին Եվրամիությունը պատրաստ է աջակցել Ադրբեջանին՝ հարաբերությունները նոր քաղաքական մակարդակի հասցնելու համար։ Այս մասին Trend գործակալությանը տված բացառիկ հարցազրույցում հայտարարել է ԵՄ ընդլայնման հարցերով հանձնակատար Մարթա Կոսը՝ ամփոփելով սեպտեմբերին Բաքու կատարած իր այցի արդյունքները։

Իր առաջին պաշտոնական այցի ընթացքում եվրահանձնակատարը հանդիպել է Ադրբեջանի նախագահ Իլհամ Ալիևի հետ՝ շնորհավորելով նրան «խաղաղ գործընթացում առաջնորդության» կապակցությամբ։ Կոսը հայտարարել է, որ ԵՄ-ն պատրաստ է մինչև 23 միլիոն եվրո տրամադրել՝ ականազերծմանն ուղղված ջանքերին աջակցելու համար։ Կոսը շեշտել է, որ ներկայիս աշխարհաքաղաքական համատեքստում տրանսպորտային կապերը շատ ավելի մեծ քաղաքական նշանակություն են ձեռք բերել թե՛ ԵՄ-ի, թե՛ Ադրբեջանի համար։

«Տարածաշրջանի ողջ ներուժը կարելի է բացահայտել՝ կապելով Կենտրոնական Ասիան և Եվրոպան։ Երկար ժամանակ անց առաջին անգամ Եվրոպայից Կենտրոնական Ասիա՝ Հարավային Կովկասի առևտրային ուղիների հեռանկարը իրականություն է դառնում», - նշել է նա։ Այս համատեքստում, ըստ եվրահանձնակատարի, Ադրբեջանը հանդիսանում է Տրանսկասպյան տրանսպորտային միջանցքի (Միջին միջանցք) առանցքային գործընկերը։ Այս նպատակով առաջիկա ամիսներին Բրյուսելում կանցկացվեն բարձր մակարդակի ֆորումներ և նախարարական հանդիպումներ՝ մասնավոր ներդրումներ ներգրավելու համար։

Անդրադառնալով հայ-ադրբեջանական խաղաղության գործընթացին՝ Մարթա Կոսը ողջունել է Վաշինգտոնում համաձայնագրի տեքստի նախաստորագրումը՝ այն համարելով կարևոր քայլ դեպի կայուն խաղաղություն։ Նա ընդգծել է, որ համաձայնագրի առանցքային տարրերից է տրանսպորտային և լոգիստիկ կապերի ընդլայնման պարտավորությունը, ինչը ոչ միայն կամրապնդի կապերը տարածաշրջանի ներսում, այլև Եվրոպան ավելի կմոտեցնի Հարավային Կովկասին և Կենտրոնական Ասիային։

Հարցազրույցի ընթացքում Կոսը նաև խստորեն դատապարտել է Ուկրաինայում Ադրբեջանի պետական նավթային ընկերության (SOCAR) ենթակառուցվածքների դեմ Ռուսաստանի հարվածները՝ դրանք անվանելով «բոլորովին անընդունելի» և Ռուսաստանի չդադարող ագրեսիայի ևս մեկ քայլ։

Եզրափակելով խոսքը՝ եվրահանձնակատարը նշել է, որ խաղաղաշինությունը և տրանսպորտային կապերի զարգացումը մնում են Ադրբեջանի հետ ապագա համագործակցության գլխավոր առաջնահերթությունները։ Նա նաև մեծ ներուժ է տեսնում համագործակցության խորացման համար այնպիսի ոլորտներում, ինչպիսիք են կլիման, շրջակա միջավայրը, կրթությունը և առևտուրը։