Էստոնիան ՄԱԿ-ում արտակարգ նիստ է հրավիրել օդային տարածքի խախտման պատճառով

Էստոնիայի խնդրանքով ՄԱԿ-ի Անվտանգության խորհրդի արտակարգ նիստ է հրավիրվել սեպտեմբերի 22-ին։ Այդ մասին հայտարարել է Էստոնիայի արտաքին գործերի նախարարությունը։

Սեպտեմբերի 19-ին հանրապետության պաշտպանության ուժերի գլխավոր շտաբը հայտարարել էր, որ երեք ռուսական կործանիչներ խախտել են Էստոնիայի օդային տարածքը՝ Վայնդլո կղզու մոտակայքում։

Ռուսաստանի պաշտպանության նախարարությունը պատասխանել էր, որ ուրբաթ երեք ռուսական ՄիԳ-31 կործանիչներ պլանային թռիչք են իրականացրել Կարելիայից դեպի Կալինինգրադի մարզ։ Թռիչքը կատարվել է միջազգային կանոնակարգերին համապատասխան, և Էստոնիայի օդային տարածքը չի խախտվել։

Գերմանիայի արտաքին գործերի նախարար Յոհան Վադեֆուլը հույս է հայտնել, որ Էստոնիան կստանա ՄԱԿ-ի Անվտանգության խորհրդի անդամների մեծամասնության աջակցությունը։ Սակայն ՄԱԿ-ի բարձրագույն մարմնի ցանկացած որոշում կարող է կասեցնել Ռուսաստանը՝ իր վետոյի իրավունքով։