Թուրքիան պատրաստ է նպաստել Կիևի և Մոսկվայի բարձր մակարդակի կապերին. Էրդողան

Թուրքիայի նախագահ Ռեջեփ Թայիփ Էրդողանը հեռախոսազրույցի ընթացքում Վոլոդիմիր Զելենսկիին ասել է, որ Անկարան պատրաստ է նպաստել Ուկրաինայի և Ռուսաստանի միջև բարձր մակարդակի կապերին: Այս մասին հայտնել է Էրդողանի գրասենյակը:

«Խոսակցության ընթացքում քննարկվել են Թուրքիայի և Ուկրաինայի միջև երկկողմ հարաբերությունները, Ուկրաինայի և Ռուսաստանի միջև խաղաղ գործընթացը, ինչպես նաև տարածաշրջանային և գլոբալ խնդիրները: Նախագահ Էրդողանը հայտարարել է, որ ուկրաինա-ռուսական պատերազմի արդարացի կարգավորումը հնարավոր է։ Նա նշել է, որ երկու կողմերի միջև բանակցությունները պետք է շարունակվեն, և որ Թուրքիան պատրաստ է անել հնարավորը բարձր մակարդակի կապերին նպաստելու համար», - նշել են գրասենյակում:

Էրդողանը նաև հայտարարել է, որ Թուրքիան շարունակում է իր ջանքերը պատերազմի ավարտման և կայուն խաղաղության հաստատման ուղղությամբ և կշարունակի ներդրում ունենալ Ուկրաինայի անվտանգության գործում խաղաղության հաստատումից հետո: