Իլոն Մասկի կարողությունը հասել է 500 միլիարդ դոլարի

Հոկտեմբերի 1-ին Իլոն Մասկը ևս մեկ կարևոր նշաձողի հասավ՝ դառնալով պատմության մեջ առաջին մարդը, ում կարողությունը կազմել է կես տրիլիոն դոլար։ Մոլորակի ամենահարուստ մարդու կարողությունն այժմ գնահատվում է 500 միլիարդ դոլար՝ ըստ Forbes-ի իրական ժամանակի միլիարդատերերի հաշվիչը։ Մասկը, ով դեկտեմբերին դարձել էր 400 միլիարդ դոլարից ավելի կարողություն ունեցող առաջին մարդը, այժմ 150 միլիարդ դոլարով առաջ է երկրորդ տեղում գտնվող Լարի Էլիսոնից և կես ճանապարհին է՝ աշխարհի առաջին տրիլիոնատեր դառնալու համար։

Չորեքշաբթի օրը Tesla-ի բաժնետոմսերն աճել են գրեթե 4%-ով՝ Մասկի կարողությանն ավելացնելով մոտ 9.3 միլիարդ դոլար։ Ներդրողները շարունակում են դրական արձագանքել այն հեռանկարին, որ Մասկը կրկին կենտրոնացել է ընկերության վրա։ Էլեկտրամոբիլներ արտադրողի բաժնետոմսերի գինը գրեթե կրկնապատկվել է այն բանից հետո, երբ Մասկը ապրիլին հայտարարեց, որ կհեռանա նախագահ Թրամփի կառավարության արդյունավետության դեպարտամենտի ղեկավարի պաշտոնից՝ ավելի շատ ժամանակ հատկացնելու Tesla-ին։

Սակայն Մասկի կես տրիլիոն դոլարանոց կարողության համար միայն Tesla-ն չէ պատասխանատուն։ Նրա հիմնադրած հրթիռաշինական SpaceX ընկերությունը, օգոստոսին կայացած մասնավոր մրցույթի արդյունքներով, այժմ գնահատվում է 400 միլիարդ դոլար՝ նախորդ դեկտեմբերի 350 միլիարդի դիմաց։ Մասկին է պատկանում SpaceX-ի բաժնետոմսերի մոտ 42%-ը, որի արժեքը կազմում է 168 միլիարդ դոլար։ Բացի այդ, կա xAI Holdings-ը, որը Մասկը ստեղծել է մարտին՝ միավորելով իր նոր՝ արհեստական բանականության ընկերություն xAI-ը 2022 թվականին ձեռք բերված X սոցիալական մեդիա ընկերության հետ (նախկինում՝ Twitter): Այդ գործարքի արդյունքում միացյալ ընկերությունը գնահատվել է 113 միլիարդ դոլար։ Մասկին է պատկանում xAI Holdings-ի բաժնետոմսերի մոտ 53%-ը, որի արժեքը 60 միլիարդ դոլար է։

500 միլիարդ դոլարի կարողության սահմանագիծը հատելը Մասկի վերջին հինգ տարվա նվաճումների շարքից հերթական դրվագն է։ 2020 թվականի մարտին նրա կարողությունը կազմում էր ընդամենը 24.6 միլիարդ դոլար։ Tesla-ի բաժնետոմսերի կտրուկ աճի շնորհիվ նա 2020 թվականի օգոստոսին դարձավ պատմության մեջ հինգերորդ մարդը, ում կարողությունը գերազանցեց 100 միլիարդ դոլարը։ 2021 թվականի հունվարին նա առաջին անգամ դարձավ աշխարհի ամենահարուստ մարդը՝ մոտ 190 միլիարդ դոլար կարողությամբ։ Այնուհետև, 2021 թվականի սեպտեմբերին, նա դարձավ երրորդ մարդը, ում կարողությունը գերազանցեց 200 միլիարդ դոլարը։ Մասկը շարունակեց իր վերելքը՝ 2021 թվականի նոյեմբերին հասնելով 300 միլիարդի, իսկ 2024 թվականի դեկտեմբերին՝ 400 միլիարդի։

Եթե նա պահպանի այս տեմպը, Մասկը կարող է դառնալ աշխարհի առաջին տրիլիոնատերը մինչև 2033 թվականի մարտը։ Սակայն, ըստ Մասկի, այդ պարգևը միայն փողի համար չէ։