Ութ իսլամական երկիր պաշտպանել է Թրամփի՝ Գազայի հարցով ծրագիրը

Սաուդյան Արաբիան, Հորդանանը, Արաբական Միացյալ Էմիրությունները, Ինդոնեզիան, Պակիստանը, Թուրքիան, Կատարը և Եգիպտոսը հանդես են եկել համատեղ հայտարարությամբ՝ ողջունելով ԱՄՆ նախագահ Դոնալդ Թրամփի առաջարկած՝ Գազայի պատերազմի կարգավորման ծրագիրը։

Ութ երկրների արտաքին գործերի նախարարները բարձր են գնահատել Թրամփի «առաջնորդությունն ու անկեղծ ջանքերը» և վստահություն հայտնել խաղաղության ճանապարհ գտնելու նրա կարողության վերաբերյալ։ Հայտարարության մեջ նախարարները ողջունել են Թրամփի նախաձեռնությունը, որը նպատակ ունի դադարեցնել պատերազմը, վերականգնել Գազան, կանխել պաղեստինցի ժողովրդի տեղահանումը և առաջ մղել համապարփակ խաղաղ կարգավորում։[4][5] Նրանք նաև առանձնահատուկ կարևորել են Թրամփի հավաստիացումը, որ թույլ չի տա Հորդանան գետի Արևմտյան ափի բռնակցումը։

Ութ երկրները հաստատել են իրենց պատրաստակամությունը՝ «դրական և կառուցողական» համագործակցելու Միացյալ Նահանգների և հակամարտող կողմերի հետ՝ համաձայնագիրը վերջնականացնելու և դրա իրագործումն ապահովելու համար։ Նրանց համատեղ հանձնառությունն ուղղված է համապարփակ գործարքի միջոցով պատերազմի ավարտին, որը կերաշխավորի.

-Գազա բավարար մարդասիրական օգնության անարգել մատակարարում,

-Պաղեստինցիների տեղահանման բացառում,

-Պատանդների ազատ արձակում,

-Բոլոր կողմերի պաշտպանությունն ապահովող անվտանգության մեխանիզմի ստեղծում,

-Իսրայելական զորքերի ամբողջական դուրսբերում,

-Գազայի վերականգնում,

-«Երկու պետություն» սկզբունքի հիման վրա արդար խաղաղության հաստատում, որի շրջանակներում Գազան ամբողջությամբ կինտեգրվի Արևմտյան ափի հետ՝ որպես պաղեստինյան պետության մաս։

Թեև ութ խոշոր և ազդեցիկ իսլամական երկրների այս միասնական դիրքորոշումը կարևոր դիվանագիտական իրադարձություն է, այն նաև առաջ է բերում որոշակի հարցեր։ Հատկանշական է, որ այս երկրները, որոնք նախկինում չէին կարողանում համախմբվել՝ Իսրայելի վրա ճնշում գործադրելու համար, այժմ հանկարծակի միավորվել են՝ աջակցելու «խիստ կասկածելի» ծրագրի։

Այս ամենի հաշվարկով, չնայած Թրամփի ծրագրի շուրջ ձևավորված լայն աջակցությանը, դրա իրագործման հեռանկարները դեռևս մնում են անորոշ՝ պայմանավորված ինչպես կողմերի միջև առկա խորը տարաձայնություններով, այնպես էլ հենց ծրագրի իրատեսականության շուրջ առկա կասկածներով։