Ռուսաստանը Ուկրաինան կգրավի 103 տարվա ընթացքում. The Economist

Ուկրաինայում Ռուսաստանի՝ այս ամռան վերջին խոշոր հարձակումը, ըստ էության, որևէ արդյունք չի տվել՝ հանգեցնելով կենդանի ուժի և տեխնիկայի հսկայական կորուստների։ Այս մասին գրում է բրիտանական The Economist-ը։

Ըստ պարբերականի գնահատականների՝ լայնամասշտաբ ներխուժման սկզբից մինչև այս տարվա հունվար ռուսական զորքերի կորուստները (սպանվածներ և վիրավորներ) կազմել են 640,000-ից մինչև 877,000 մարդ, որոնցից 137,000-228,000-ը՝ զոհվածներ։ Սակայն մինչև հոկտեմբերի 13-ը այդ կորուստներն աճել են գրեթե 60%-ով՝ հասնելով 984,000-ից մինչև 1,438,000-ի, այդ թվում՝ 190,000-480,000 զոհ։

The Economist-ը շեշտում է, որ Ռուսաստանի կրած հսկայական կորուստները չեն հանգեցրել համաչափ տարածքային ձեռքբերումների։ Այն պահից, երբ 2022 թվականի հոկտեմբերին ռազմաճակատի գիծը կայունացավ, այն գրեթե չի փոխվել, և որևէ խոշոր քաղաք ձեռքից ձեռք չի անցել։

Պարբերականը նաև կանխատեսում է անում՝ հիմնվելով վերջին 30 օրվա տեմպերի վրա։ Ըստ դրա՝ Ռուսաստանի հավակնած չորս մարզի՝ Լուգանսկի, Դոնեցկի, Խերսոնի և Զապորոժիեի մնացած մասերի գրավումը տեղի կունենա ոչ շուտ, քան 2030 թվականի հունիսը։ Իսկ ամբողջ Ուկրաինան գրավելու համար Ռուսաստանից կպահանջվի ևս 103 տարի։