Պավել Դուրովը գործարկել է Cocoon ապակենտրոնացված AI-ցանցը

Telegram-ի հիմնադիր Պավել Դուրովը հայտարարել է թվային աշխարհում նոր և մասշտաբային նախագծի՝ Cocoon ցանցի պաշտոնական գործարկման մասին։ Անվանումը բացվում է որպես «Confidential Compute Open Network», թարգմանաբար՝ «Կոնֆիդենցիալ հաշվողական բաց ցանց»: Սա ոչ միայն տեխնոլոգիական նորույթ է, այլև յուրօրինակ պատասխան ժամանակակից թվային մարտահրավերներին։

Հարթակն արդեն իսկ սկսել է իր գործունեությունը. արհեստական բանականությանը (AI) ուղղված օգտատերերի առաջին հարցումներն այժմ մշակվում են լիակատար գաղտնիության պայմաններում։ Համակարգի աշխատանքի մեխանիզմը կառուցված է պարզ և թափանցիկ տրամաբանությամբ. GPU-մայներների սեփականատերերը, ովքեր տրամադրում են իրենց հաշվողական հզորությունները ցանցի աշխատանքի համար, վարձատրություն են ստանում Toncoin (TON) կրիպտոարժույթով։ Կարևոր է նշել, որ նախագծի թափանցիկությունն ապահովելու համար Դուրովը հասանելի է դարձրել ամբողջական փաստաթղթերն ու ծրագրային ելակետային կոդը։

Cocoon-ի ստեղծման գլխավոր դրդապատճառը շուկայում տիրող իրավիճակն է։ Պավել Դուրովը սուր քննադատության է ենթարկել ոլորտի այնպիսի հսկաների, ինչպիսիք են Amazon-ը և Microsoft-ը։ Ըստ գործարարի՝ այս կենտրոնացված մատակարարները վերածվել են թանկարժեք միջնորդների, որոնք ոչ միայն արհեստականորեն բարձրացնում են ծառայությունների գները, այլև նվազեցնում են գաղտնիության մակարդակը։ Ի հակադրություն դրան՝ Cocoon-ը կոչված է լուծելու ինչպես տնտեսական, այնպես էլ գաղտնիության հետ կապված այն խնդիրները, որոնք բնորոշ են AI հիմքով աշխատող հնացած մատակարարներին։

Դեռևս 2025 թվականի հոկտեմբերի վերջին կայացած անոնսի ժամանակ Դուրովը նշել էր, որ նախագծում համակցվելու են արհեստական բանականությունն ու TON բլոկչեյնը։ Նրա համոզմամբ՝ աշխարհն այսօր շարժվում է «տարօրինակ ուղղությամբ», որտեղ մարդիկ աստիճանաբար կորցնում են իրենց «թվային ազատությունները»։ Այս գործընթացը կասեցնելու միակ ճանապարհը նա տեսնում է ապակենտրոնացված տեխնոլոգիաների ստեղծման մեջ։

Նոր հարթակը երկկողմանի օգուտ է խոստանում. հավելվածների մշակողները հնարավորություն կստանան օգտվելու AI-գործիքներից՝ շատ ավելի մատչելի պայմաններով, իսկ շարքային օգտատերերը կկարողանան կիրառել արհեստական բանականությունը՝ պահպանելով անանունությունը։ Դուրովը նաև հայտնել է, որ նախատեսվում է ապագայում ընդլայնել նախագծի մասշտաբները՝ դարձնելով այն էլ ավելի հասանելի և հզոր։