Դրոններ, լազեր, գերձայնային հրթիռներ. ՀԱՊԿ-ը համալրում է զինանոցը

Լարված ռազմաքաղաքական իրավիճակի պայմաններում Հավաքական անվտանգության պայմանագրի կազմակերպությունը (ՀԱՊԿ) պատրաստվում է իր հիմնարար փաստաթղթերում առաջին անգամ ներառել սպառազինության նոր տեսակներ։ «Известия»-ի տեղեկություններով՝ խոսքը գերձայնային ու լազերային զենքերի, ինչպես նաև անօդաչու համակարգերի մասին է։ Այս քայլով կազմակերպության անդամ երկրները (Հայաստան, Բելառուս, Ղազախստան, Ղրղզստան, Ռուսաստան, Տաջիկստան) նպատակ ունեն համաձայնեցնել դրանց կիրառումը ռազմական սպառնալիքների դեմ։

Համապատասխան համաձայնագրի նախագիծը կքննարկվի հոկտեմբերի 7-ին, Սանկտ Պետերբուրգում՝ ՀԱՊԿ խորհրդարանական վեհաժողովի պաշտպանության և անվտանգության հարցերի հանձնաժողովի նիստում։ Կազմակերպության միացյալ շտաբի պետ, գեներալ-գնդապետ Անդրեյ Սերդյուկովը նշել է, որ այս նախաձեռնության անհրաժեշտությունը պայմանավորված է կազմակերպության պատասխանատվության գոտում ռազմաքաղաքական իրավիճակի սրմամբ։

Նրա խոսքով՝ ժամանակակից զինված հակամարտություններում, այդ թվում՝ Ուկրաինայում, կողմերը կիրառում են սպառազինության ամենաժամանակակից տեսակները և փորձարկում հեռանկարային նմուշներ։

Փաստաթղթում «սպառազինության նոր տեսակներ» հասկացությունը սահմանվում է բավականին լայն՝ որպես «զինված պայքարում հակառակորդին խոցելու համար նախատեսված սարքեր և առարկաներ», որոնք ներառում են գիտության և տեխնիկայի նվաճումները, այդ թվում՝ ոչ մահաբեր, հոգեֆիզիկական և այլ ազդեցության միջոցներ՝ «հակառակորդին խաղաղության պարտադրելու նպատակով»։ Ռազմական փորձագետ Դմիտրի Կոռնևի կարծիքով՝ ներկայումս ՀԱՊԿ երկրների զինանոցում առկա նորագույն զենքերը հիմնականում երեք տեսակի են։

Փորձագետները նշում են, որ նման համաձայնագրի անհրաժեշտությունը պայմանավորված է նաև նոր տեխնոլոգիաների, մասնավորապես՝ արհեստական բանականության արագ զարգացմամբ և ռազմական ոլորտում դրանց կիրառմամբ։ Նոր փաստաթուղթը պետք է սահմանի միասնական կանոններ, համատեղ պլանավորման և փորձաքննության մեխանիզմներ՝ նպատակ ունենալով ամրապնդել կազմակերպության դերը Եվրասիայում անվտանգության նոր ճարտարապետության կառուցման գործում։