Հետ կանգնեք, այլ ուղի ընտրեք. Դանիայի ԱԳ նախարարի ուղերձը Ռուսաստանին

Դանիայի արտաքին գործերի նախարար Լարս Լյոքքե Ռասմուսենը հայտարարել է, որ Ռուսաստանը պետք է անհապաղ դադարեցնի իր սադրիչ և հարձակողական գործողությունները։

«Ռուսաստանի հարևանները լիովին հիմնավորված մտահոգություն ունեն, որ կարող են դառնալ հաջորդ թիրախը։ Դանիան ամբողջությամբ աջակցում է Էստոնիայի տարածքային ամբողջականությանը։ Ռուսական սադրանքները պետք է դադարեցվեն։ Այդ պատճառով այսօր մենք դիմում ենք Ռուսաստանի Դաշնությանը՝ հետ կանգնեք։ Հետ կանգնեք։ Ընտրեք այլ ուղի», — հայտարարել է Ռասմուսենը։

Նրա խոսքով՝ Ռուսաստանը չի կարող անկառավարելի անորոշություն և քաոս ստեղծել այն վայրերում, որտեղ ցանկանա։

«Օդային տարածքի խախտումները խարխլում են միջազգային իրավունքի այն հիմնարար սկզբունքները, որոնք ծառայում են մեզ բոլորիս», — հավելել է դանիացի բարձրաստիճան դիվանագետը։