ԿԿՀ-ն ստուգելու է բոլոր կուսակցությունների ֆինանսական հաշվետվությունները

Կոռուպցիայի կանխարգելման հանձնաժողովը (ԿԿՀ) մտադիր է վերանայել ոչ միայն պետական ֆինանսավորում ստացող, այլև ընտրություններին մասնակցած բոլոր կուսակցությունների ֆինանսական հաշվետվությունները։ Սակայն, միևնույն ժամանակ, հանձնաժողովը խոստովանում է, որ գործող օրենսդրությամբ արդյունավետ լծակներ չունի բարձրաստիճան քաղաքական պաշտոնյաներին պատասխանատվության ենթարկելու համար։ Այս մասին լրագրողների հետ զրույցում և ԱԺ-ում բյուջետային լսումների ժամանակ հայտարարել է ԿԿՀ նախագահի ժամանակավոր պաշտոնակատար Մարիամ Գալստյանը։

Անդրադառնալով վարչապետ Նիկոլ Փաշինյանի ֆեյսբուքյան գրառմանը, որտեղ օգտագործվել էին «դոմփել» և «համբալ» բառերը, Գալստյանը նշեց, որ հանձնաժողովը եզրակացրել է, որ վարչապետը խախտել է վարքագծի կանոնը։ Սակայն, ի պատասխան հարցին, թե արդյոք բավարար պատասխանատվության միջոց է կիրառվել, նա պարզաբանեց. «Հանձնաժողովը իրավասու է կատարել այն, ինչ օրենքով է գրված։ Որևէ այլ լծակ, քան պաշտոնական հրապարակում ներկայացնելը, օրենքով նախատեսված չէ»։

Գալստյանի խոսքով, այս խնդիրը վերաբերում է բոլոր քաղաքական պաշտոն զբաղեցնող անձանց։ Նա խոստովանեց, որ այս համակարգն արդյունավետ չէ։ «Մեր տարեկան հաղորդումներում բազմիցս ներկայացրել ենք, որ քաղաքական պաշտոնների դեպքում պատասխանատվության այս միջոցները արդյունավետ չեն։ Գործնականում ստացվում է, որ հանձնաժողովը մի շարք գործառույթներ է իրականացնում, վարչական ռեսուրս է ծախսում, բայց պատասխանատվությունը բացառապես հանրային է», - ասաց նա՝ հավելելով, որ անհրաժեշտ են օրենսդրական փոփոխություններ։

Միևնույն ժամանակ, ԿԿՀ-ն ակտիվանալու է կուսակցությունների ֆինանսական գործունեության վերահսկողության հարցում։ Գալստյանը հայտարարեց, որ կվերանայվեն անհամապատասխանություններ պարունակող բոլոր հաշվետվությունները։ Սա տեղի է ունենում այն ֆոնին, երբ ավելի վաղ վարչապետ Փաշինյանը հայտարարել էր, որ կուսակցությունների անթափանց գործունեությունը կարող է հարցեր առաջացնել ընտրություններին նրանց մասնակցության վերաբերյալ։ Որոշ փորձագետների կարծիքով, սա կարող է լինել ընդդիմադիր ուժերի վրա ճնշումների ևս մեկ գործիք։