Չինաստանի պետական ընկերությունները դադարեցրել են ռուսական նավթի գնումները

Չինաստանի պետական նավթային ընկերությունները, հետևելով Հնդկաստանի խոշորագույն նավթավերամշակող գործարանների օրինակին, դադարեցրել են ռուսական նավթի գնումները։ Պատճառը ԱՄՆ-ի կողմից «Ռոսնեֆտ»-ի և «Լուկօյլ»-ի դեմ սահմանված պատժամիջոցներն են։

Ինչպես հայտնում է Reuters-ը՝ հղում անելով ոլորտի աղբյուրներին, PetroChinа-ն, Sinopec-ը, CNOOC-ն և Zhenhua Oil-ը որոշել են առնվազն կարճաժամկետ հեռանկարում ձեռնպահ մնալ ռուսական նավթի հետ կապված նոր գործարքներից։ Այս որոշումը կազդի ծովային ճանապարհով Չինաստան արտահանվող ռուսական նավթի մինչև մեկ երրորդի վրա։ Ըստ Vortexa-ի և Energy Aspects-ի գնահատականների, պետական ընկերությունները Ռուսաստանից օրական գնում են 250-ից 500 հազար բարել նավթ։

Ընդհանուր առմամբ, Չինաստան տանկերներով օրական մատակարարվում է 1,4 միլիոն բարել ռուսական նավթ։ Այս մատակարարումների հիմնական մասը, սակայն, բաժին է ընկնում անկախ մասնավոր նավթավերամշակող գործարաններին։ Reuters-ի աղբյուրների համաձայն՝ նրանք, ամենայն հավանականությամբ, նույնպես ժամանակավորապես կդադարեցնեն ներմուծումը, սակայն կձգտեն այն վերսկսել։

Ավելի վաղ հայտնի էր դարձել, որ պատժամիջոցների պատճառով ռուսական նավթից հրաժարվում են նաև Հնդկաստանի խոշորագույն նավթավերամշակող գործարանները։ Bloomberg-ի աղբյուրները հայտնել են, որ նրանք նախատեսում են Ռուսաստանից ներմուծումը կրճատել գրեթե զրոյի։ Կրեմլի խոշորագույն հնդկական հաճախորդը՝ Reliance Industries-ը, կտրուկ կնվազեցնի կամ ամբողջությամբ կդադարեցնի գնումները։ Պայմանագրերը վերանայում են նաև Indian Oil Corp-ը, Bharat Petroleum Corp-ը, Hindustan Petroleum Corp-ը և Mangalore Refinery-ն։

Reuters-ի զրուցակիցների պնդմամբ՝ հնդկական և չինական նավթավերամշակող գործարանները մտադիր են ռուսական նավթը փոխարինել Մերձավոր Արևելքից, Աֆրիկայից և Լատինական Ամերիկայից ստացվող մատակարարումներով։