Ճգնաժամ Գյումրու ավագանիում. հնարավոր են արտահերթ ընտրություններ

Գյումրու քաղաքապետարանում հոկտեմբերի 20-ին իրականացված հատուկ գործողություններից և դրան հաջորդած կալանավորումներից հետո քաղաքի ավագանին հայտնվել է խորը քաղաքական ճգնաժամի մեջ։ Թիվ 31 ընտրատարածքային ընտրական հանձնաժողովը (ԸԸՀ) շարունակում է ավագանու անդամներից մանդատներից հրաժարվելու և ընտրական ցուցակները լքելու դիմումներ ստանալ, ինչը հանգեցրել է մանդատների շղթայական վերաբաշխման և ավագանու աշխատանքի բնականոն ընթացքի խաթարման։

Ճգնաժամը հատկապես սուր է դրսևորվել «Կոմունիստական կուսակցության» խմբակցությունում։ Ի սկզբանե կալանավորման պատճառով մանդատներից հրաժարվեցին Գևորգ Ղուկասյանը և Սեդրակ Խաչատրյանը։ Նրանց փոխարինեցին ցուցակի հաջորդ համարները՝ Տիգրան Ավագյանը և Սամսոն Էլբակյանը։ Սակայն, դեռևս մանդատը չստանձնած, Տիգրան Ավագյանը ևս կալանավորվեց և կալանավայրից ներկայացրեց մանդատը վայր դնելու դիմում։

Թիվ 31 ԸԸՀ նախագահ Տիգրան Ղազարյանը հանձնաժողովի արտահերթ նիստում պարզաբանել է իրավիճակը. «Արձանագրություն է ուղարկվել համայնքապետարան այն մասին, որ Տիգրան Ավագյանը վայր է դրել մանդատը։ Համայնքապետարանը արձանագրությունն ուղարկել է հանձնաժողով»։ Նրա խոսքով՝ Ավագյանի մանդատը կհանձնվի կուսակցության ընտրացուցակի հաջորդ համարին՝ Արտյոմ Մկրտչյանին։ Սակայն այստեղ ևս խնդիր կա. Մկրտչյանը զբաղեցնում է համայնքապետարանի կոմունալ տնտեսության բաժնի պետի ժամանակավոր պաշտոնակատարի պաշտոնը, որը, համաձայն ՏԻՄ օրենքի, անհամատեղելի է ավագանու անդամի մանդատի հետ։ Նա մեկ ամիս ժամանակ ունի՝ ընտրություն կատարելու երկու պաշտոնների միջև։ Բացի այդ, ինքնաբացարկի դիմում է ներկայացրել նաև նույն խմբակցությունից Գնել Մանուկյանը։

Մանդատների խնդիր կա նաև «Մեր քաղաքը» կուսակցությունների դաշինքում։ Ավագանու անդամ Նարեկ Միրզոյանը մանդատից հրաժարվելու դիմում է ներկայացրել։ Ցուցակի հաջորդ համարը՝ Հասմիկ Խաչատրյանը, նույնպես ինքնաբացարկ է հայտնել։ Արդյունքում, հանձնաժողովը մանդատը կփոխանցի դաշինքի ընտրացուցակի 10-րդ համարին՝ Արտակ Հովսեփյանին։

Ավագանու մեկ նիստ արդեն իսկ չի կայացել «Քաղաքացիական պայմանագիր» խմբակցության բոյկոտի պատճառով։ Քվորում ապահովելու համար ընդդիմությանն անհրաժեշտ է 17 մանդատ։ Եթե ավագանին երեք ամիս անընդմեջ նիստ չգումարի, այն, ըստ օրենքի, կլուծարվի, և կնշանակվեն արտահերթ ընտրություններ։ Որոշ վերլուծաբաններ չեն բացառում նաև նման հեռանկարը։