Նոր տվյալներ՝ Վրաստանում թուրքական C-130 Hercules ինքնաթիռի կործանման մասին

C-130 Hercules ինքնաթիռի աղետի վայրում աշխատող մասնագետները պարզել են, որ ինքնաթիռից առաջինը պոկվել է պոչային հատվածը։ Այս առանցքային փաստը դրվել է միջադեպի նախնական վերակառուցման հիմքում։ Այդ մասին գրում է թուրքական Milliyet պարբերականը։ Ֆյուզելաժի մանրամասն զննությամբ արտաքին ազդեցության հետքեր, որոնք կարող էին վկայել պայթյունի կամ դրսից հարձակման մասին, չեն հայտնաբերվել։ Քննչական խումբը շարունակում է վերլուծել կառուցվածքի փլուզման պատճառները և անկումից առաջ վերջին վայրկյաններին տեղի ունեցած իրադարձությունները։

Փորձագետները սկսել են «սև արկղի» վերծանումը, իսկ բեկորների ցրվածության սխեման դիտարկվում է որպես աղետի ամբողջական ժամանակագրությունը վերականգնելու կարևորագույն գործիք։

Հրապարակման մեջ ճշտվել են նաև ինքնաթիռում եղած բեռի վերաբերյալ տվյալները։ C-130-ը տեղափոխում էր պահեստամասեր և տեխնիկական մասնագետների՝ Ադրբեջանում Հաղթանակի օրվա միջոցառումներին մասնակցած Թուրքիայի ռազմաօդային ուժերի վեց F-16 կործանիչների սպասարկման համար։ Հետադարձի ճանապարհին ինքնաթիռը տեղափոխում էր շուրջ վեց տոննա պահեստամաս։ Հատուկ ընդգծվում է, որ ինքնաթիռում ռազմամթերք և պայթուցիկ նյութեր չեն եղել։

Փաստացի, հետաքննության նախնական տվյալները հերքում են ահաբեկչության կամ արտաքին հարձակման վարկածը՝ քննության ուշադրությունը կենտրոնացնելով տեխնիկական անսարքության կամ մարդկային գործոնի հնարավորության վրա։