Բրյուսելյան բեկում. Հայաստանն ու ԵՄ-ն ստորագրել են ռազմավարական նոր օրակարգը

Հայաստանի և Եվրոպական միության հարաբերությունները թևակոխում են զարգացման որակապես նոր և ավելի խորը փուլ։ Բրյուսելում կայացած ՀՀ-ԵՄ գործընկերության խորհրդի վեցերորդ նիստը նշանավորվել է առանցքային իրադարձությամբ՝ կողմերը պաշտոնապես ստորագրել են գործընկերության ռազմավարական օրակարգը։

Երկկողմ հարաբերությունների համար անկյունաքարային նշանակություն ունեցող այս փաստաթուղթը ստորագրել են ՀՀ արտգործնախարար Արարատ Միրզոյանը և Եվրամիության արտաքին գործերի և անվտանգության քաղաքականության հարցերով բարձր հանձնակատար Կայա Կալասը։ Այս կապակցությամբ նախարար Միրզոյանն իր խոսքում նշել է.

«Մենք ընդունեցինք նոր՝ Հայաստան–ԵՄ ռազմավարական օրակարգը, որը լրացնում է Համապարփակ և ընդլայնված գործընկերության համաձայնագիրը (ՀԸԳՀ) և մեր գործընկերության օրակարգը բարձրացնում ռազմավարական մակարդակի։ Հայաստան-ԵՄ գործընկերությունը մտնում է նոր և ավելի հավակնոտ փուլ՝ ընդհանուր տեսլականով և պատասխանատվությամբ՝ միտված մեր քաղաքացիների համար կոնկրետ արդյունքների շարունակական ապահովմանը»։

Ստորագրված փաստաթուղթն ընդգրկում է կյանքի գրեթե բոլոր կարևորագույն ոլորտները։ Ինչպես ավելի վաղ մանրամասնել էր Եվրամիության ընդլայնման քաղաքականության հարցերով բարձր հանձնակատար Մարթա Կոսը, ռազմավարական օրակարգը ներառելու է լայնածավալ աջակցություն, որն ուղղված կլինի Հայաստանի տնտեսական զարգացման խթանմանն ու պետական ինստիտուտների ուժեղացմանը։

Սակայն նոր օրակարգի ամենաուշագրավ կետերից մեկը վերաբերում է անվտանգային բաղադրիչին։ Ըստ պաշտոնական տեղեկատվության՝ «գործընկերության նոր օրակարգը ներառելու է նաև համագործակցություն պաշտպանության և անվտանգության ոլորտում»։ Սա հստակ ազդակ է, որ Երևանն ու Բրյուսելը պատրաստակամ են ընդլայնելու համագործակցության շրջանակները՝ ներառելով նաև պաշտպանական հարցերը։

Բացի այդ, Եվրամիությունը հանձնառություն է ստանձնել աջակցել Հայաստանին ներքին կայունության և անվտանգության ապահովման հարցում, հատկապես՝ սպասվող կարևոր քաղաքական իրադարձությունների ֆոնին։ Մասնավորապես, եվրոպական կողմը կօգնի դիմակայել սպասվող խորհրդարանական ընտրություններին ընդառաջ հնարավոր հիբրիդային սպառնալիքներին, ապատեղեկատվության տարածմանն ու կիբեռհարձակումներին։