Բրիտանիան Ադրբեջանի հետ հարաբերությունները բարձրացրել է նոր մակարդակի

Մեծ Բրիտանիայի Եվրոպայի հարցերով նախարար Սթիվեն Դոութին Բաքու կատարած այցի ժամանակ հայտարարել է Մեծ Բրիտանիայի և Ադրբեջանի միջև հարաբերությունները ռազմավարական գործընկերության մակարդակի բարձրացնելու մասին։

Ինչպես նշել են Մեծ Բրիտանիայի ԱԳՆ-ից՝ քննարկումները կենտրոնացած էին հայ-ադրբեջանական խաղաղության գործընթացի, Ռուսաստան-Ուկրաինա հակամարտության և տարածաշրջանային անվտանգության վրա։

Ըստ բրիտանական պաշտոնական աղբյուրների, այցն ընդգծում է Մեծ Բրիտանիայի նորացված հանձնառությունը՝ ամրապնդել կապերը Ադրբեջանի հետ, որը Հարավային Կովկասի տարածաշրջանում ճանաչվում է որպես Մեծ Բրիտանիայի ամենակարևոր ռազմավարական գործընկերներից մեկը։

Դոութին հանդիպում է ունեցել նաև Ադրբեջանի նախագահի հետ։ Քննարկել են տնտեսական զարգացման և անվտանգության ոլորտում համագործակցության ընդլայնման հնարավորությունները՝ նշելով տարածաշրջանային կայունության և բարգավաճման ապահովման գործում Ադրբեջանի դերը։