Ջո Բայդենը բարձր է գնահատել Թրամփի ջանքերը Գազայի հարցում

ԱՄՆ նախկին նախագահ Ջո Բայդենը շնորհակալություն է հայտնել Սպիտակ տան ներկայիս ղեկավար Դոնալդ Թրամփին՝ Գազայի հատվածում հրադադարի մասին համաձայնագրի կնքման կապակցությամբ։ Սակայն, նախքան Թրամփի ջանքերը գնահատելը, Բայդենն իր X-ի պաշտոնական էջում հրապարակված գրառման մեջ ընդգծել է իր իսկ վարչակազմի դերակատարումն այս գործընթացում։

«Այս համաձայնագրին տանող ճանապարհը հեշտ չէր։ Իմ վարչակազմն անխոնջ աշխատել է գերիներին տուն վերադարձնելու, պաղեստինցի խաղաղ բնակչությանն օգնություն ցուցաբերելու և պատերազմը դադարեցնելու ուղղությամբ»,- գրել է Բայդենը՝ հստակեցնելով, որ խաղաղության հիմքերը դրվել են դեռևս իր պաշտոնավարման օրոք։

Այս նախաբանից հետո միայն նախկին նախագահն անդրադարձել է ներկայիս վարչակազմի հաջողությանը։ «Ես հարգանքի տուրք եմ մատուցում նախագահ Թրամփին և նրա թիմին՝ հրադադարի վերջնական համաձայնագրի հասնելու ջանքերի համար»,- նշել է նա։

Բայդենի հայտարարությունը եզրափակվում է Մերձավոր Արևելքի ապագայի վերաբերյալ լավատեսական ուղերձով։ Նա հույս է հայտնել, որ ձեռք բերված հրադադարը կլինի կայուն և կդառնա տարածաշրջանում տևական խաղաղության հիմք։ «Այժմ, ԱՄՆ-ի և ողջ աշխարհի աջակցությամբ, Մերձավոր Արևելքը կանգնել է խաղաղության ճանապարհին, որը, հուսով եմ, կլինի ամուր և կապահովի ինչպես իսրայելցիների, այնպես էլ պաղեստինցիների համար հավասարապես խաղաղության, արժանապատվության և անվտանգության ապագա»,- եզրափակել է Բայդենը։