Բաքուն հիշեցրել է պայմանները՝ Սահմանադրություն և անկլավներ

Ադրբեջանի արտաքին գործերի նախարարությունը, ի դեմս մամուլի ծառայության ղեկավար Այխան Հաջիզադեի, հիշեցրել է Բաքվի նախապայմանները Հայաստանի հետ հարաբերությունների կարգավորման և տարածաշրջանային գործընթացների վերաբերյալ։ Հաջիզադեի մեկնաբանությունները ի մի են բերում Ադրբեջանի առանցքային պահանջները՝ խաղաղության պայմանագրի ստորագրումը կապելով ՀՀ Սահմանադրության փոփոխության հետ և օրակարգում պահելով անկլավների հարցը։

Անդրադառնալով Հայաստանի հետ խաղաղության պայմանագրի ստորագրման հնարավոր վայրի մասին քննարկումներին՝ Հաջիզադեն ընդգծել է, որ դա երկրորդական հարց է։ Նրա խոսքով՝ ստորագրման վայրը կարելի է քննարկել «միայն բոլոր պայմանների կատարումից հետո»։ Որպես այդպիսի առանցքային և անկյունաքարային պայման՝ Բաքուն դիտարկում է Հայաստանի Սահմանադրության փոփոխությունը։

«Ադրբեջանի կողմից խաղաղության պայմանագրի ստորագրման առանցքային պայմանը Հայաստանի Սահմանադրության մեջ փոփոխություններ կատարելն է, որտեղ «պահպանվում են Ադրբեջանի նկատմամբ տարածքային պահանջները»», - հայտարարել է ԱԳՆ խոսնակը։ Նա նաև հավելել է, որ այս պայմանը, ըստ իրենց, «անուղղակիորեն նշված է Թրամփի ներկայությամբ Ադրբեջանի և Հայաստանի ղեկավարների կողմից ստորագրված համատեղ Հռչակագրում»։

Հաջիզադեն վերահաստատել է, որ այսպես կոչված ադրբեջանական չորս անկլավների վերադարձի հարցը ևս շարունակում է մնալ Բաքվի արտաքին քաղաքականության գերակայություններից։ «Ղազախի շրջանի երեք գյուղերի և Նախիջևանի Քարքի գյուղի վերադարձը Ադրբեջանին միշտ էլ գերակա խնդիր է», - ասել է նա։ Ադրբեջանի ԱԳՆ ներկայացուցիչը հստակեցրել է, որ այդ հարցը պետք է իր լուծումը գտնի երկու երկրների միջև գործող սահմանազատման հանձնաժողովների շրջանակում։

Բացի երկկողմ հարաբերություններից, Հաջիզադեն անդրադարձել է նաև տարածաշրջանային համագործակցության «3+3» (Հայաստան, Ադրբեջան, Վրաստան – Ռուսաստան, Իրան, Թուրքիա) ձևաչափին։ Նա հայտարարել է, որ հաջորդ հանդիպումը պետք է անցկացվի Ադրբեջանում։ Միևնույն ժամանակ, նա բացահայտել է որոշակի տարաձայնություններ Հայաստանի հետ այս հարցում։ «Անցած տարվա հոկտեմբերին Ստամբուլում կայացած վերջին հանդիպման ժամանակ մենք փորձեցինք վերջնական փաստաթղթում ներառել մի դրույթ, որ համապատասխան հանդիպումները կկազմակերպվեն հերթականությամբ Ադրբեջանի և Հայաստանի կողմից, սակայն Հայաստանը դեմ էր»,- նշել է Հաջիզադեն։