Բաքուն պլանավորում է փակել Ադրբեջանում ռուսական դպրոցները

Ադրբեջանում շուտով կփակվեն բոլոր ռուսալեզու դպրոցները. ծնողներն արդեն ստացել են փուլային փակման մասին ծանուցումներ, ահազանգում են ադրբեջանական լրատվամիջոցները։

Ինչպես գրում է Oxu.Az-ը, աշակերտների ծնողները այդ մասին ծանուցումներ են ստացել դպրոցական WhatsApp խմբերի միջոցով: Տարածվող տեղեկության համաձայն՝ այս միջոցառումն ուղղված է «ադրբեջաներենի՝ որպես կրթության հիմնական լեզվի դիրքերի ամրապնդմանը»: Նախատեսվում է, որ դպրոցները կանցնեն ադրբեջաներենով ուսուցման երեք տարվա ընթացքում:

Հիշեցնենք, որ 2024-ի օգոստոսին Ադրբեջանի նախագահը հայտարարել էր, որ երկրում գործում է 324 ռուսալեզու դպրոց: Նրա խոսքով՝ այդ դպրոցներում սովորում է 160 հազար երեխա, իսկ ևս 800 հազար աշակերտ ռուսերեն է սովորում որպես երկրորդ լեզու:

Ռուսալեզու դպրոցների հավանական փակման մասին լուրը հայտնվել է Մոսկվայի և Բաքվի միջև հարաբերությունների զգալի վատթարացման ֆոնին: