Մեխիկոյում բողոքի զանգվածային ցույցեր են. ավելի քան 100 տուժած կա

Մեքսիկայի մայրաքաղաք Մեխիկոյում հազարավոր մարդիկ դուրս են եկել փողոց՝ մասնակցելու հակակառավարական բողոքի ցույցերի, որոնք վերաճել են բախումների ոստիկանության հետ։ Ըստ պաշտոնական տվյալների՝ տուժել է առնվազն 120 մարդ, որոնցից 100-ը ոստիկանության աշխատակիցներ են։

Ցույցերի առիթ է դարձել երկրում տիրող բռնության մթնոլորտը և նախագահ Կլաուդիա Շեյնբաումի վարած քաղաքականությունը։ Ցուցարարների դժգոհության գլխավոր պատճառներից մեկը Ուրուապան քաղաքի քաղաքապետ Կառլոս Մանսոյի սպանությունն է, որը հայտնի էր նարկոկարտելների դեմ իր խիստ դիրքորոշմամբ և անողոք պայքարի կոչերով։ Ցուցարարները, որոնց զգալի մասը «Z սերնդի» երիտասարդներ էին, իրենց բողոքի ձայնն են բարձրացրել կոռուպցիայի, իշխանության չարաշահման և անպատժելիության դեմ։

Բողոքի ակցիան, որը կազմակերպվել էր «Generation Z Mexico» երիտասարդական շարժման կողմից, արագ թափ է հավաքել՝ գրավելով հազարավոր քաղաքացիների։ Ցուցարարները երթով շարժվել են դեպի Ազգային պալատ, որտեղ գտնվում է նախագահ Շեյնբաումի նստավայրը։ Իրավիճակը սրվել է, երբ ցուցարարները փորձել են քանդել պալատը պաշտպանող արգելապատնեշները, ինչին ոստիկանությունը պատասխանել է արցունքաբեր գազի կիրառմամբ։ Բախումների հետևանքով 40 ոստիկան հոսպիտալացվել է, իսկ 20 քաղաքացի ձերբակալվել է կողոպուտի և հարձակման մեղադրանքով։

Մեխիկոյի քաղաքապետ Կլարա Բրուգադան դատապարտել է բռնությունները՝ հայտարարելով, որ բողոքի իրավունքը չպետք է վերածվի բռնության։ Միևնույն ժամանակ, նախագահ Շեյնբաումը հայտարարել է, որ ցույցերը ֆինանսավորվում են ընդդիմադիր աջ քաղաքական ուժերի կողմից, որոնք դեմ են իր կառավարությանը։ Նա նաև կասկածի տակ է դրել ցույցերի ինքնաբուխ բնույթը՝ նշելով, որ դրանց մասին տեղեկությունները համացանցում տարածվել են բոտերի միջոցով։

Չնայած իր պաշտոնավարման առաջին տարում 70%-ից բարձր վարկանիշին և ֆենտանիլի թրաֆիքինգի դեմ պայքարում որոշակի հաջողություններին, Շեյնբաումը բախվում է քննադատության՝ երկրում բռնությունը զսպելու անկարողության համար։ Նրա վարած քաղաքականությունը դժգոհություն է առաջացնում ոչ միայն երկրի ներսում, այլև հարևան պետությունների հետ հարաբերություններում։ Վերջերս Պերուի Կոնգրեսը Շեյնբաումին «պերսոնա նոն գրատա» է հայտարարել այն բանից հետո, երբ Մեքսիկան ապաստան է տրամադրել Պերուի նախկին վարչապետին, որը մեղադրվում է 2022 թվականին պետական հեղաշրջման փորձի մեջ։