Ինչպիսին են Երևան այցելած ադրբեջանցիների լրագրողների առաջին արձագանքները

Նախօրեին Հայաստան այցելած ադրբեջանցի լրագրողներն ու փորձագետները մեկնելուց հետո սկսել են կիսվել այցից և Հայաստանից ստացած իրենց տպավորություններով։ Նրանցից մեկը՝ Ֆահրադ Մամմադովը, նախ փաստ է մատնացույց արել, որ ադրբեջանցիները ժամանել են ադրբեջանական ինքնաթիռով, որը վայրէջք է կատարել «Զվարթնոց»-ում։

Ադրբեջանական լրատվամիջոցներն այս իրադարձությունը որակել են որպես «դետալ, որը շուտով կարող է նորմ դառնալ երկկողմ հարաբերություններում»։ Ընդգծվել է, որ հանդիպման բոլոր մանրամասները՝ թռիչքից մինչև օրակարգ, քննարկվել են բացառապես երկկողմ ձևաչափով՝ առանց միջնորդների։

Պատվիրակությանը հոկտեմբերի 22-ին ընդունել է ՀՀ Անվտանգության խորհրդի քարտուղար Արմեն Գրիգորյանը։ Նա բարձր է գնահատել նման ձևաչափով հանդիպումները՝ նշելով, որ դրանք «միտված են դրականորեն ազդելու մարդկանց միջև շփումների հաստատմանը»։ Իր հերթին, ադրբեջանական կողմը նշել է, որ հանդիպումը կազմակերպվել է բարձր մակարդակով, իսկ կառավարություններն արդեն «բավականաչափ բովանդակություն են ստեղծել քաղաքացիական հասարակության ներկայացուցիչներին խաղաղ գործընթացին միացնելու համար»։

Ադրբեջանական մամուլը նաև անդրադարձել է հայկական և ադրբեջանական որոշ կայքերում հնչող քննադատություններին ու վիրավորանքներին՝ դա համարելով «նորմալ՝ ներկա շրջանի համար»։ Ըստ ադրբեջանական կողմի՝ դեռ շատ անելիք կա, որպեսզի հասարակությունները հարմարվեն կառավարությունների խաղաղասիրական օրակարգին։