Ադրբեջանը համաձայնել է զորք ուղարկել Գազայի հատված․ The Times of Israel

Իսրայելական հեղինակավոր լրատվամիջոցները հայտնում են, որ Ադրբեջանը կարող է միանալ այն երկրների շարքին, որոնք զորք կուղարկեն Գազայի հատված՝ որպես միջազգային կայունացնող ուժերի մաս։ Այս առաքելության նպատակն է լինելու իրավիճակի կարգավորումը տարածաշրջանում՝ երկամյա պատերազմի ավարտից հետո։

Ինչպես հաղորդում է Ynet պորտալը, այս մասին իսրայելցի պատգամավորներին տեղեկացրել են Պաշտպանության նախարարության ներկայացուցիչները՝ խորհրդարանի արտաքին հարաբերությունների և պաշտպանության հանձնաժողովի փակ նիստի ժամանակ։

Ըստ The Times of Israel-ի աղբյուրների՝ Ադրբեջանն արդեն իսկ իր պատրաստակամությունն է հայտնել միանալու այս առաքելությանը։ Ադրբեջանի հետ մեկտեղ նշվում են նաև երկու այլ մուսուլմանական երկրների անուններ՝ Ինդոնեզիա և Պակիստան։

Հաղորդվում է, որ Ինդոնեզիան արդեն հրապարակավ հայտարարել է Գազա զորք ուղարկելու իր մտադրության մասին, մինչդեռ Պակիստանի հնարավոր մասնակցությունը դեռևս պաշտոնապես հաստատված չէ։