Ադրբեջանում կալանավորվեց ընդդիմադիր Ալի Քերիմլին

Ադրբեջանում իրավապահ համակարգը կոշտ միջոցներ է ձեռնարկել երկրի ընդդիմադիր դաշտի առանցքային դեմքերից մեկի նկատմամբ։

Սաբաիլի շրջանային դատարանը որոշում է կայացրել կալանավորել Ադրբեջանի ժողովրդական ճակատ կուսակցության (ԱԺՃԿ) նախագահ Ալի Քերիմլիին։ Ինչպես հայտնում է ադրբեջանական Trend-ը, դատարանը քննարկել և բավարարել է Ադրբեջանի Պետական անվտանգության ծառայության (ՊԱԾ) ներկայացրած միջնորդությունը՝ քաղաքական գործչի նկատմամբ որպես խափանման միջոց ընտրելով կալանքը՝ 2 ամիս 15 օր ժամկետով։

Քերիմլիին առաջադրվել է բավականին լուրջ մեղադրանք: Նա մեղադրվում է իշխանությունը բռնի զավթելուն ուղղված գործողությունների, ինչպես նաև պետության սահմանադրական կարգը բռնի կերպով փոխելու համար։

Հիշեցնենք, որ այս զարգացումներին նախորդել էր նոյեմբերի 29-ին Քերիմլիի տանը Պետական անվտանգության ծառայության կողմից իրականացված խուզարկությունը։

Ըստ պաշտոնական տեղեկատվության՝ այդ գործողությունները կատարվել են Ռամիզ Մեխտիևի դեմ հարուցված քրեական գործի շրջանակներում, որը ևս քննվում է նույն կառույցի կողմից։

Հատկանշական է, որ Սաբաիլի շրջանային դատարանը որոշում է կայացրել նաև այս գործով անցնող մյուս առանցքային ֆիգուրի՝ հատկապես ծանր հանցագործությունների մեջ մեղադրվող Ռամիզ Մեխտիևի վերաբերյալ։ Դատարանը բավարարել է նրա դեմ ներկայացված միջնորդությունը և որպես խափանման միջոց սահմանել չորս ամսվա տնային կալանքը։