Ավինյան․ Նուբարաշենի աղբավայրի հրդեհը դիտավորյալ էր

Գիշերը Նուբարաշենի աղբավայրում բռնկված հրդեհը հաջողվել է ամբողջությամբ մարել։ Սակայն առանձին հատվածներում ծխացող օջախների չեզոքացման աշխատանքները շարունակվում են առավոտյան ժամերին։

Երևանի քաղաքապետ Տիգրան Ավինյանը տեղեկացրել է, որ փրկարար ծառայության և Երևանի քաղաքապետարանի համապատասխան ստորաբաժանումները ողջ գիշեր աշխատել են դեպքի վայրում։

Քաղաքապետը հավելել է, որ տեղի ունեցածը պատահականություն չէր, այլ դիտավորյալ հրդեհ է։

«Խոսել եմ ԱԱԾ տնօրենի և ՆԳ նախարարի հետ։ Հրդեհի հետ որևէ առնչություն ունեցող անձը կենթարկվելու է պատասխանատվության օրենքի ամբողջ խստությամբ», — նշել է Ավինյանը։

Հրդեհի հետևանքով համայնքային և բնապահպանական անվտանգության տեսանկյունից լուրջ ռիսկեր են ստեղծվել։ Այս ֆոնին խստացվել է աղբավայրի տարածք մուտքի և ելքի վերահսկողությունը, և կիրառվում են հավելյալ անվտանգային միջոցներ՝ նման դեպքերի կրկնությունը բացառելու նպատակով։

Դեպքի մանրամասները պարզելու համար ընթանում է համապատասխան քննություն։