Հայաստանը՝ աշխարհաքաղաքական խաչմերուկում․ մարտահրավե՞ր, թե՞ հնարավորություն

Այս շաբաթ Հայաստանը տարածաշրջանային հետաքրքրությունների կենտրոնում էր։ Վաշինգտոնում փաստաթղթերի ստորագրումից հետո՝ Իրանի նախագահի պաշտոնական այցը ու դրանից մեկ օր անց Ռուսաստանի փոխվարչապետի գալը մեր երկիր՝ ոչ միայն հստակ մեսիջ էր Հայաստանին, այլ նաև Արևմուտքին ու Միացյալ Նահանգներին։ Կարողացա՞վ արդյոք Հայաստանի իշխանությունը վստահեցնել իսլամական հանրապետությանը, որ իր տարածքով բացվող ճանապարհը չի կտրի իր կապը հյուսիսի հետ։ Իրանի նախագահը թափանցիկ ակնարկներ է արել, որ իրենց վստահությունը վերջնական չէ։ Ի դեպ, ռուս գործընկեր Շոյգուի հետ խոսելուց մեկ օր անց Հայաստանի անվտանգության խորհրդի քարտուղարը այսօր ընդունել է ԱՄՆ դեսպանին, քննարկել Թրամփի ուղին։