Արարատ Միրզոյանը մասնակցել է G20-ի նախարարական հանդիպմանը

Ութ տասնամյակ շարունակ ՄԱԿ-ը մարմնավորել է մեր ընդհանուր ձգտումը՝ կանխել պատերազմի աղետը, խթանել կայուն զարգացումն ու համընդհանուր բարեկեցությունը, ինչպես նաև պաշտպանել մարդու իրավունքներն ու հիմնարար ազատությունները: Այդ մասին ասել է ՀՀ ԱԳ նախարար Արարատ Միրզոյանը՝ ՄԱԿ ԳԱ 80-րդ նստաշրջանի Մեծ քսանյակի նախարարական հանդիպման ժամանակ։

Ընդգծել է, որ այսօր հակամարտությունները և աշխարհաքաղաքական լարվածությունը, որոնք ուղեկցվում են տնտեսական անկայունությամբ, մարդու իրավունքների շարունակական խախտումներով, շրջակա միջավայրի վատթարացմամբ և խորացող անհավասարությամբ, վտանգում են համագործակցությունը և 2030 թվականի օրակարգի իրագործման համար դժվարությամբ ձեռք բերված առաջընթացը:

ՀՀ արտգործնախարարի խոսքի զգալի հատվածը խաղաղությանն էր նվիրված։ «Անցյալ տարի ես նաև նշել էի, որ մեր խաղաղության օրակարգի շրջանակներում Հայաստանը ներկայացրել է «Խաղաղության խաչմերուկ» նախաձեռնությունը, որն ուղղված է Հայաստանի, նրա հարևան երկրների, ինչպես նաև շատ ավելի լայն աշխարհագրությամբ փոխկապվածության զարգացմանը: Այս տարի, ԱՄՆ-ի, Հայաստանի և Ադրբեջանի կողմից Համատեղ հռչակագրի ստորագրմամբ, մենք համաձայնության ենք եկել հիմնարար սկզբունքների շուրջ՝ պետությունների ինքնիշխանություն, տարածքային ամբողջականություն, սահմանների անձեռնմխելիություն և իրավազորություն, և այժմ աշխատում ենք այդ սկզբունքների ներքո գործարկվելիք տեխնիկական լուծումների շուրջ:

Մենք վստահ ենք, որ տրանսպորտային հաղորդակցությունների լիարժեք բացումը և տարածաշրջանի տարանցիկ ու առևտրային ներուժի իրացումը շրջադարձային կլինի»,- նշել է ՀՀ արտգործնախարարը: Վստահություն է հայտնել, որ «Խաղաղության խաչմերուկ» նախաձեռնության իրականացումը՝ ներառյալ դրա անբաժանելի մաս կազմող TRIPP փոխկապակցվածության ծրագիրը, կստեղծի տնտեսական աճի, երկխոսության և ժողովուրդների միջև շփումների նոր հնարավորություններ՝ այդպիսով նպաստելով ավելի լայն կայունությանն ու բարգավաճմանը: