Արաղչի. Իրանի դեմ պատժամիջոցները սխալ հաշվարկ են

Եվրոպան սխալ է վարվում՝ հետևելով Դոնալդ Թրամփի ռազմավարությանը: Այդ մասին հայտարարել է Իրանի ԱԳՆ Աբաս Արաղչին՝ ընդգծելով, որ Թեհրանը բաց է դիվանագիտության և միջուկային ծրագրի շուրջ նոր համաձայնագրի կնքման համար: Պայմանն այն է, որ պատժամիջոցները պետք է չեղարկվեն, փոխանցում է Mehr-ը։

«Ժամանակին Եվրոպան զսպող ուժ էր, որը ձգտում էր սանձել մեր տարածաշրջանում առավելագույն նպատակներ ունեցող ռազմատենչ Ամերիկային, իսկ այսօր հանդուրժում է Վաշինգտոնի անկարգությունները»,- գրել է Արաղչին The Guardian-ում հրապարակված հոդվածում։

Հիշեցնենք, որ օգոստոսի վերջին Մեծ Բրիտանիան, Ֆրանսիան և Գերմանիան կամ «Եվրաեռյակը» հայտարարեցին, որ ակտիվացրել են Իրանի նկատմամբ ՄԱԿ-ի պատժամիջոցների «սնեփբեք» գործընթացը։

Այս մեխանիզմը ստեղծվել է 2015 թվականի միջուկային համաձայնագրով պարտավորությունների էական չկատարման համար պատժելու համար, որը ստորագրվել է Իրանի, Եվրաեռյակի, ԱՄՆ-ի, Չինաստանի և Ռուսաստանի կողմից։ Համարելով, որ Իրանը պայմանավորվածություններ է խախտել՝ եվրոպական երկրները հայտարարել են, թե գործարկում են պատժամիջոցնրի մեխանիզմը:

«Սա լրջագույն սխալ հաշվարկ է, որն անխուսափելիորեն հանգեցնելու է հակառակ հետևանքների»,- նշել է Իրանի գլխավոր դիվանագետը։