Արաղչի. Մեր օբյեկտները ոչնչացված են, բայց մեր տեխնոլոգիաները տեղում են

Իրանի միջուկային խնդրի շուրջ ռազմական լուծում գոյություն չունի, իսկ համաձայնության կարելի է հասնել միայն դիվանագիտության և արդար բանակցությունների միջոցով՝ առանց կողմերից որևէ մեկի թելադրանքի։ Այս մասին միջազգային համաժողովի ժամանակ հայտարարել է Իրանի արտաքին գործերի նախարար Աբբաս Արաղչին։

«Մենք երբեք չենք հրաժարվի միջուկային տեխնոլոգիաներ մշակելու և ուրանը հարստացնելու մեր իրավունքից։ Այժմ մենք ավելի ուժեղ ենք, քան 12-օրյա պատերազմի ժամանակ», - ընդգծել է նա։ Արաղչիի խոսքով՝ Թեհրանի միջուկային ծրագիրը հիմնված է Միջուկային զենքի չտարածման մասին պայմանագրի (ՄԶՉՊ) 4-րդ հոդվածով ամրագրված իրավունքների վրա։

Իրանի ԱԳ նախարարը նշել է, որ Իսրայելը, ԱՄՆ-ի աջակցությամբ, իրականացնում է իր աշխարհաքաղաքական նկրտումները՝ «ոտնահարելով միջազգային իրավունքի հիմքերը»։ Նա Վաշինգտոնին մեղադրել է «ապակառուցողական քաղաքականություն» վարելու և ուժի դիրքերից Թեհրանին իր պայմանները պարտադրելու փորձերի մեջ։

«Իսրայելի և ԱՄՆ-ի ագրեսիային Իրանի պատասխանը տրվել է ՄԱԿ-ի կանոնադրության 51-րդ հոդվածի խիստ համաձայնությամբ, որը տալիս է ինքնապաշտպանության անքակտելի իրավունք», - հավելել է Արաղչին՝ եզրափակելով. «Մեր օբյեկտները ոչնչացված են, բայց մեր տեխնոլոգիաները տեղում են, իսկ մեր կամքն էլ ավելի է ամրապնդվել»։