Անօդաչուի պատճառով տասնյակ չվերթներ են հետաձգվել Իսպանիայի օդանավակայանում

Հոկտեմբերի 19-ին Իսպանիայի Պալմա դե Մալյորկայի օդանավակայանի աշխատանքը ժամանակավորապես դադարեցվել է օդային տարածքում հայտնված չարտոնված անօդաչու թռչող սարքի (ԱԹՍ) պատճառով։ Իսպանիայի օդային նավիգացիայի կարգավորման մարմինը՝ Enaire-ն, անվտանգության նկատառումներից ելնելով, անմիջապես դադարեցրել է բոլոր թռիչքներն ու վայրէջքները։

Միջադեպի հետևանքով Պալմա ուղևորվող մոտ մեկ տասնյակ չվերթ վերաուղղորդվել է դեպի այլ օդանավակայաններ, այդ թվում՝ Բարսելոնա և Վալենսիա։ Օդանավակայանի աշխատանքը վերսկսվել է երեկոյան ժամը 8-ին մոտ, սակայն առաջացած կուտակումների պատճառով բազմաթիվ չվերթներ իրականացվել են մինչև 90 րոպե ուշացումով։.

Քանի որ Մալյորկան բրիտանացի զբոսաշրջիկների սիրված ուղղություններից է, տուժածների զգալի մասը հենց Մեծ Բրիտանիայի քաղաքացիներ են եղել։ Տասնյակ բրիտանացիներ ստիպված են եղել ժամերով սպասել լեփ-լեցուն տերմինալներում՝ իրենց դժգոհությունը հայտնելով տեղեկատվության պակասից։

Նշենք, որ իսպանական օրենսդրությունը խստիվ արգելում է ԱԹՍ-ների թռիչքներն օդանավակայաններից 5 կմ շառավղով։ Սա եվրոպական ավիացիայի համար աճող խնդիր է, նմանատիպ դեպքեր վերջերս գրանցվել են նաև Մյունխենի, Ֆրանկֆուրտի և այլ օդանավակայաններում։ Իսպանիայի իշխանությունները հետաքննություն են սկսել՝ անօդաչու սարքի օպերատորին հայտնաբերելու և միջադեպի մանրամասները պարզելու համար։