Անօդաչուները կաթվածահար են արել Կոպենհագենի և Օսլոյի օդանավակայանները

Երկուշաբթի երեկոյան անհայտ անօդաչու թռչող սարքերի հայտնվելը լուրջ խափանումների պատճառ է դարձել Սկանդինավյան տարածաշրջանի երկու խոշորագույն օդանավակայաններում՝ ստիպելով մի քանի ժամով դադարեցնել բոլոր թռիչքները Կոպենհագենում և Օսլոյում։ Թեև օդանավակայաններն էլ արդեն վերսկսել են աշխատանքը, տասնյակ չվերթներ ուղղորդվել են այլ օդանավակայաններ, իսկ հազարավոր ուղևորներ բախվել են ուշացումների և չվերթների չեղարկումների հետ։ Դանիայի և Նորվեգիայի իշխանությունները համատեղ հետաքննություն են սկսել՝ պարզելու, թե արդյոք այս երկու միջադեպերը փոխկապակցված են։

Կոպենհագենի օդանավակայանը, որը Հյուսիսային Եվրոպայի ամենածանրաբեռնված օդային հանգույցն է, բոլոր թռիչքներն ու վայրէջքները դադարեցրել է երկուշաբթի երեկոյան՝ տեղական ժամանակով 20:26-ին։ Աշխատանքի դադարը տևել է մոտ չորս ժամ։ Դանիական ոստիկանության հաղորդմամբ՝ օդանավակայանի մոտակայքում նկատվել է երկու կամ երեք խոշոր ԱԹՍ։ FlightRadar ծառայության տվյալներով՝ այս ընթացքում շուրջ 50 չվերթ ուղղորդվել է դեպի այլընտրանքային օդանավակայաններ։ Կոպենհագենի ոստիկանության փոխհանձնակատար Յակոբ Հանսենը հայտարարել է, որ սկսվել է ինտենսիվ հետաքննություն՝ ԱԹՍ-ների տեսակը պարզելու համար։ «Անօդաչու սարքերն անհետացել են, և մեզ չի հաջողվել դրանցից որևէ մեկը որսալ», – հավելել է նա։

Գրեթե միաժամանակ նմանատիպ իրավիճակ է ստեղծվել Նորվեգիայի մայրաքաղաք Օսլոյի օդանավակայանում։ Նորվեգական օդանավակայանների օպերատոր «Avinor»-ը հայտնել է, որ օդային տարածքը փակվել է կեսգիշերին՝ դարձյալ անօդաչուների հայտնաբերման պատճառով։ Օսլոյի օդանավակայանը չի գործել ավելի քան երեք ժամ, և բոլոր չվերթներն ուղղորդվել են դեպի մոտակա օդանավակայաններ։ Աշխատանքը վերսկսվել է միայն տեղական ժամանակով առավոտյան 3:22-ին։

Թե ո՞ւմ էին պատկանում անօդաչուները և ի՞նչ առաքելություն ունեին օդանավակայանների հարակից հատվածներում՝ դեռ մանրամասներ չեն հրապարակվել։ Ըստ պաշտոնական պարզաբանման՝ օդանավակայաններին չի հաջողվել որսալ կամ նույնականացնել ԱԹՍ-ները։

Այս միջադեպերը տեղի են ունենում եվրոպական օդային փոխադրումների համար բարդ շրջանում։ Մոտ մեկ շաբաթ առաջ կիբերհարձակման հետևանքով Լոնդոնի Հիթրոու, Բեռլինի և Բրյուսելի օդանավակայաններում շարքից դուրս էին եկել գրանցման և նստեցման համակարգերը։ Դրա հետևանքները զգացվում էին նաև հանգստյան օրերին։ ԱԹՍ-ներով պայմանավորված խափանումները նորություն չեն. 2018 թվականին Լոնդոնի Գեթվիք օդանավակայանում նմանատիպ միջադեպի պատճառով տասնյակ հազարավոր ուղևորներ տուժեցին, իսկ հարյուրավոր չվերթներ չեղարկվեցին։

Ներկայումս Կոպենհագենի և Օսլոյի օդանավակայանների ղեկավարությունը նախազգուշացնում է, որ թեև աշխատանքները վերսկսվել են, ուշացումներն ու որոշ չվերթների չեղարկումները դեռ կշարունակվեն։ Ուղևորներին հորդորում են կապ հաստատել իրենց ավիաընկերությունների հետ՝ թռիչքների վերաբերյալ տեղեկատվությունը ճշտելու համար։