Ամուլսարում շինարարությունն անցնում է 24/7 ռեժիմի

«Լիդիան Արմենիա» ընկերությունը հայտարարել է Ամուլսարի հանքավայրի շինարարական աշխատանքների տեմպերի կտրուկ արագացման մասին։ Առաջիկա ամիսներին հիմնական օբյեկտների շինարարությունն ավարտին հասցնելու նպատակով, եկող շաբաթվանից հանքավայրում աշխատանքները կանցնեն շուրջօրյա՝ 24/7 ռեժիմի։

Այս մասշտաբային շինարարությունն իրականացնելու համար ներկայումս օբյեկտում ներգրավված է 500-ից 550 աշխատակից և շուրջ 400 միավոր ծանր տեխնիկա։ Աշխատանքային ռեժիմի փոփոխությունը թույլ կտա առավելագույնի հասցնել տեխնիկայի և մարդկային ռեսուրսների արդյունավետությունը՝ ապահովելով շինարարության շարունակական ընթացքը։

Հարկ է նշել, որ շահագործման հանձնվելուց հետո Ամուլսարի հանքավայրը կդառնա Հայաստանի լեռնահանքային արդյունաբերության երկրորդ խոշորագույն օբյեկտը՝ զիջելով միայն Քաջարանի պղնձամոլիբդենային կոմբինատին։