ԱՄՆ-ում ավարտվեց պատմական «շաթդաունը»

Նոյեմբերի 12-ին Դոնալդ Թրամփը ստորագրել է օրենսդրական փաթեթը՝ վերջ դնելով ԱՄՆ պատմության մեջ կառավարության աշխատանքի ամենաերկարատև դադարեցմանը։ Սա տեղի ունեցավ այն բանից ժամեր անց, երբ Ներկայացուցիչների պալատը կողմ քվեարկեց ֆինանսավորման վերսկսմանը՝ նպատակ ունենալով վերականգնել պարենային օգնության ծրագրերը, վճարել հարյուր հազարավոր դաշնային աշխատակիցների աշխատավարձերը և կարգավորել օդային երթևեկության կառավարման խաթարված համակարգի աշխատանքը։

Հանրապետականների կողմից վերահսկվող պալատը փաթեթն ընդունեց 222 կողմ, 209 դեմ ձայների հարաբերակցությամբ։ Նախագահ Թրամփի աջակցությունը մեծապես օգնեց համախմբել իր կուսակցությանը՝ չնայած Ներկայացուցիչների պալատի դեմոկրատների կոշտ դիմադրությանը։ Դեմոկրատները դժգոհ էին, որ Սենատում իրենց գործընկերների սկսած երկարատև դիմակայությունը չկարողացավ ապահովել դաշնային բժշկական ապահովագրության սուբսիդիաների երկարաձգումը։

Թրամփի կողմից օրինագծի ստորագրումը, որը շաբաթվա սկզբին արդեն հաստատվել էր Սենատի կողմից, թույլ կտա 43-օրյա «շաթդաունի» պատճառով անգործության մատնված դաշնային աշխատողներին վերադառնալ իրենց աշխատանքին արդեն հինգշաբթի օրվանից։ Այնուամենայնիվ, դեռևս պարզ չէ, թե որքան արագ կվերականգնվեն պետական ծառայությունների և գործառույթների ամբողջական ծավալը։ «Մենք երբեք չպետք է թույլ տանք, որ սա կրկնվի», - ասել է Թրամփը ուշ երեկոյան կայացած ստորագրման արարողության ժամանակ՝ օգտագործելով առիթը՝ քննադատելու դեմոկրատներին։ «Այսպես երկիր չեն կառավարում»։

Գործարքը երկարաձգում է ֆինանսավորումը մինչև հունվարի 30-ը։ Դադարի ավարտը որոշակի հույս է տալիս, որ օդային ճանապարհորդությունների համար կենսական նշանակություն ունեցող ծառայությունները ժամանակ կունենան վերականգնվելու, քանի որ մինչև Գոհաբանության օրվա հետ կապված ճամփորդությունների ալիքը մնացել է ընդամենը երկու շաբաթ։

Տնտեսագետների գնահատմամբ՝ «շաթդաունի» յուրաքանչյուր շաբաթը համախառն ներքին արդյունքից կրճատում էր ավելի քան մեկ տասներորդ տոկոսային կետ, թեև սպասվում է, որ կորցրած արտադրանքի մեծ մասը կվերականգնվի առաջիկա ամիսներին։

Չնայած փոխադարձ մեղադրանքներին՝ կողմերից և ոչ մեկը կարծես թե հստակ հաղթանակ չի տարել։ Reuters/Ipsos-ի կողմից չորեքշաբթի օրը հրապարակված հարցման համաձայն՝ ամերիկացիների 50%-ը դադարի համար մեղադրում է հանրապետականներին, իսկ 47%-ը՝ դեմոկրատներին։