«ԱՄՆ-ում թագավորներ չպետք է լինեն». միլիոնավոր մարդիկ՝ Թրամփի դեմ

Շաբաթ օրը Ամերիկայի Միացյալ Նահանգների բոլոր 50 նահանգներում միլիոնավոր մարդիկ դուրս են եկել բողոքի զանգվածային երթերի՝ ընդդեմ նախագահ Դոնալդ Թրամփի վարչակազմի։ «Ոչ թագավորներին» կոալիցիայի կողմից կազմակերպված այս երկրորդ խոշոր ակցիան միավորել էր քաղաքացիներին այն մտահոգության շուրջ, որ երկիրը սահում է դեպի ավտորիտարիզմ։

Բողոքի ցույցերը, որոնց միացել էր ավելի քան 200 կազմակերպություն, ընդգրկել էին ինչպես մեծ քաղաքները, այնպես էլ փոքր համայնքները։ Ցուցարարները կրում էին պաստառներ, որոնք քննադատում էին Թրամփի քաղաքականությունը, ներգաղթի դաշնային գործակալների գործողությունները կամ պարզապես ծաղրում էին նախագահին։ Շատ քաղաքներում, այդ թվում՝ Վաշինգտոնում, որտեղ Կապիտոլիումի մոտ հավաքվել էր ավելի քան 200,000 մարդ, ցուցարարները կրում էին կենդանիների փչովի զգեստներ։ Գորտերի կերպարները, որոնք հատկապես տարածված էին, դարձել էին Օրեգոն նահանգի Պորտլենդ քաղաքում սկիզբ առած դիմադրության խորհրդանիշը։

Չիկագոյի Գրանթ զբոսայգում, ըստ նախնական տվյալների, հավաքվել էր առնվազն 10,000 մարդ, սակայն Chicago Tribune-ը հետագայում գնահատեց, որ մասնակիցների թիվը հասել է 100,000-ի։ Երբ ելույթի համար բեմ բարձրացավ Իլինոյսի ներկայացուցիչ Ջոնաթան Ջեքսոնը, ամբոխը սկսեց վանկարկել՝ «Գրողի տարը Դոնալդ Թրամփին»։ Շատ պաստառների վրա առկա արտահայտությունների պատճառով հեռուստաալիքները նախազգուշացնում էին հեռուստադիտողներին, որ պատասխանատվություն չեն կրում դրանց բովանդակության համար։

Կազմակերպիչները մատնանշել էին բողոքի մի քանի հիմնական պատճառներ։ Նրանց պնդմամբ՝ Թրամփը հարկատուների գումարներն օգտագործում է իշխանությունը զավթելու համար՝ դաշնային զորքեր ուղարկելով քաղաքներ, հայտարարել է, որ ցանկանում է մնալ երրորդ ժամկետով և «արդեն իրեն պահում է միապետի պես»։ Նշվում էր նաև, որ վարչակազմը չափն անցել է՝ անտեսելով դատարաններին, կրճատելով ծառայությունները և մարդկանց արտաքսելով առանց պատշաճ իրավական ընթացակարգերի։

Ցույցերին մասնակցում էին նաև մի շարք հայտնի քաղաքական գործիչներ, այդ թվում՝ դեմոկրատ սենատորներ Չակ Շումերն ու Քրիս Մերֆին, ինչպես նաև անկախ սենատոր Բեռնի Սանդերսը։ Կազմակերպիչները շեշտում էին իրենց հավատարմությունը ոչ բռնի դիմադրությանը՝ տասնյակ հազարավոր մասնակիցների համար անցկացնելով անվտանգության և լարվածության թուլացման մարտավարության դասընթացներ։