«Շաթդաունի» պատճառով ԱՄՆ-ում չվերթները կարող են կրճատվել 20%-ով

Միացյալ Նահանգների տրանսպորտի նախարար Շոն Դաֆին ուրբաթ օրը զգուշացրել է, որ կարող է ավիաընկերություններին պարտադրել կրճատել չվերթների մինչև 20%-ը, եթե կառավարության աշխատանքի դադարեցումը (շաթդաուն) չավարտվի։ Այս հայտարարության ֆոնին ամերիկյան ավիաընկերությունները շտապ կարգով փորձում են իրականացնել կառավարության կողմից սահմանված աննախադեպ կրճատումները։

Արդեն ուրբաթ օրը ԱՄՆ ավիացիայի դաշնային վարչությունը (FAA) 40 խոշոր օդանավակայաններում ավիաընկերություններին հանձնարարել է կրճատել թռիչքների 4%-ը։ Նախատեսվում է, որ մինչև նոյեմբերի 14-ը այդ ցուցանիշը կհասնի 10%-ի։

Խնդրի հիմքում ռեկորդային՝ 38-օրյա շաթդաունն է, որի պատճառով 13,000 ավիադիսպետչեր և 50,000 անվտանգության աշխատակից ստիպված են աշխատել առանց վարձատրության։ Սա հանգեցրել է աշխատանքից բացակայությունների կտրուկ աճի։ Միայն ուրբաթ օրը ավիադիսպետչերների բացակայության պատճառով հարյուրավոր չվերթներ են հետաձգվել 10 օդանավակայաններում, այդ թվում՝ Ատլանտայում, Սան Ֆրանցիսկոյում և Վաշինգտոնում։ FlightAware կայքի տվյալներով՝ գրանցվել է ավելի քան 5,300 թռիչքի հետաձգում։

Թրամփի վարչակազմը փորձում է օդային փոխադրումների խափանումների հեռանկարն օգտագործել՝ Կոնգրեսի դեմոկրատների վրա ճնշում գործադրելու համար, որպեսզի նրանք համաձայնեն դաշնային կառավարության ֆինանսավորման հանրապետականների պլանին։ Դեմոկրատներն իրենց հերթին շաթդաունի համար մեղադրում են հանրապետականներին՝ առողջապահական սուբսիդիաների շուրջ բանակցելուց հրաժարվելու համար։

Նախարար Դաֆին հայտարարել է, որ եթե իրավիճակը վատանա, և ավելի շատ դիսպետչերներ աշխատանքի չներկայանան, հնարավոր է՝ ստիպված լինեն կրճատել չվերթների 20%-ը։ «Մենք որոշումներ կկայացնենք՝ ելնելով օդային տարածքում տիրող իրավիճակից», - ասել է նա։

Խոշորագույն չորս ավիաընկերությունները՝ American Airlines-ը, Delta Air Lines-ը, Southwest Airlines-ը և United Airlines-ը, ուրբաթ օրը կրճատել են շուրջ 700 չվերթ։ American Airlines-ի գործադիր տնօրեն Ռոբերտ Այսոմը նշել է, որ սկզբնական կրճատումները զգալի խափանումներ չեն առաջացնի, սակայն զգուշացրել է, որ «ժամանակի ընթացքում չեղարկումների այս մակարդակը կաճի, և դա խնդրահարույց կլինի»։

Կրճատումները չեն անդրադառնում միջազգային չվերթների վրա, սակայն FAA-ն սահմանափակում է նաև տիեզերական արձակումները և կարող է կրճատել նաև մասնավոր ինքնաթիռների թռիչքները։