ԱՄՆ-ը վետո է դրել ՄԱԿ-ի Անվտանգության խորհրդի բանաձևի նախագծի վրա

Սեպտեմբերի 18-ին ԱՄՆ-ը վետո է դրել ՄԱԿ-ի Անվտանգության խորհրդի բանաձևի նախագծի վրա, որը պահանջում էր «անհապաղ, անվերապահ և մշտական» հրադադար Գազայի հատվածում, ինչպես նաև Իսրայելի կողմից այդ պաղեստինյան տարածաշրջան մարդասիրական օգնության տրամադրման բոլոր սահմանափակումների վերացում։ Ինչպես փոխանցում է Reuters գործակալությունը, Վաշինգտոնն արդեն վեցերորդ անգամ է վետո դնում նման փաստաթղթի վրա։ «Միացյալ Նահանգները մերժում է այս անընդունելի բանաձևը։ Ժամանակն է, որ ՀԱՄԱՍ-ն անհապաղ ազատ արձակի բոլոր առանց բացառության պատանդներին և անվերապահորեն հանձնվի։ Միացյալ Նահանգները կշարունակի աշխատել իր գործընկերների հետ՝ վերջ տալու այս սարսափելի հակամարտությանը», - ասել է ՄԱԿ-ում ԱՄՆ մշտական ներկայացուցիչ Մորգան Օրտագուսը՝ հիմնավորելով Դոնալդ Թրամփի վարչակազմի որոշումը։

Բանաձևի նախագիծը պատրաստվել էր ՄԱԿ-ի Անվտանգության խորհրդի 15 անդամներից տասի կողմից։ Մնացած 14 պետությունները, ի տարբերություն ԱՄՆ-ի, պաշտպանել են օգոստոսին նախաձեռնված այս փաստաթուղթը։ «Թող այս բանաձևը հստակ ուղերձ դառնա, ազդանշան, որ Անվտանգության խորհուրդը երես չի թեքում սովամահ խաղաղ բնակիչներից, պատանդներից և հրադադարի պահանջից», - հայտարարել է ՄԱԿ-ում Դանիայի դեսպան Քրիստինա Լասենը։ Իր հերթին նրա իսրայելցի գործընկեր Դենի Դանոնը շեշտել է, որ «Իսրայելի դեմ ուղղված բանաձևերը չեն ազատի պատանդներին և անվտանգություն չեն բերի տարածաշրջան»՝ կրկին հերքելով իր երկրին ուղղված մեղադրանքները Գազայում պաղեստինցիների ցեղասպանության վերաբերյալ։

Հիշեցնենք, որ իրավիճակը Մերձավոր Արևելքում կտրուկ սրվեց 2023 թվականի հոկտեմբերի 7-ին։ ՀԱՄԱՍ շարժումը, որը Եվրամիությունում և ԱՄՆ-ում ճանաչված է որպես ահաբեկչական, լայնածավալ հարձակում գործեց Իսրայելի վրա։ Գրոհայինները զանգվածային հրթիռային հարված հասցրին Իսրայելին, ներխուժեցին նրա տարածք և իրականացրին խաղաղ բնակչության ամենազանգվածային սպանությունը ժամանակակից իսրայելական պետության պատմության մեջ՝ սպանելով մոտ 1200 մարդու։ Գրոհայինները նաև գերեվարեցին ավելի քան 250 պատանդի և նրանց տեղափոխեցին Գազայի հատված։ Պատանդների մի մասը փոխանակվել կամ ազատ է արձակվել, մի մասը՝ զոհվել։

Ի պատասխան՝ Իսրայելը պատերազմ հայտարարեց ՀԱՄԱՍ-ին։ Ցամաքային գործողության և Գազայի հատվածի ռմբակոծությունների ընթացքում զոհվել է ավելի քան 60 հազար պաղեստինցի, ավելի քան 145 հազարը վիրավորվել է, պնդում է Գազայի առողջապահության նախարարությունը։