ԱՄՆ-ն զորքեր է կուտակում Վենեսուելայի ափերի մոտ

Բազմաթիվ լրատվամիջոցների և Պենտագոնի տվյալներով՝ ԱՄՆ-ն պատրաստվում է ռազմական բախման սոցիալիստական Վենեսուելայի և նրա նախագահ Նիկոլաս Մադուրոյի հետ։ Վերջերս ԱՄՆ նախագահ Դոնալդ Թրամփն աշխարհը ցնցեց թմրամիջոցների կարտելների դեմ իր անողոք արշավով, բայց շարունակում է հերքել Վենեսուելայի վրա հարձակման մասին պնդումները. «Ոչ, դա ճիշտ չէ»,- լրագրողներին ասել է նա, երբ հարցրել են ռազմական հարվածների նախապատրաստման մասին։

Այնուամենայնիվ, Թրամփի գործողությունները հակառակն են փաստում. սեպտեմբերից ի վեր ԱՄՆ բանակի ստորաբաժանումներ են տեղակայվել Կարիբյան ավազանի տարածաշրջանում՝ հիմնականում Սան Խուանու, Պուերտո Ռիկոյում, ինչպես նաև Գուանտանամո ծոցի բազայում, փոքր կղզի-պետություններում և Վենեսուելայի ափամերձ գծում։ Այս ուժերը ներառում են մի քանի ռազմանավեր, ժամանակակից F-35 կործանիչներ և MQ-9 Reaper մարտական անօդաչու թռչող սարքեր։

«Սա ուժի ցուցադրություն է։ Մադուրոն պետք է հասկանա, որ ԱՄՆ-ը պատրաստ է, անհրաժեշտության դեպքում, պատերազմ սկսել Վենեսուելայի հետ։ Պատերազմ, որում Վենեսուելան անպայման կպարտվի. նրա բանակը զգալիորեն ավելի թույլ է»,- հայտարարել է անվտանգության փորձագետ Պիտեր Նոյմանը, հաղորդում է Bild-ը։

Նոյմանը բացատրել է, որ ԱՄՆ-ն նախկինում միջազգային ջրերում հարձակվել է միայն «նարկոնավերի» վրա. «Սա դեռևս Վենեսուելայի վրա ուղղակի հարձակում չէ։ Հաջորդ քայլը այս գործողությունների հետևում կանգնած ենթակառուցվածքների ոչնչացումն է։ Օրինակ՝ այն նավահանգիստները, որտեղից մեկնում են նման նավերը կամ թմրանյութերի ապօրինի շրջանառության մեջ ներգրավված ռազմական բազաները»։

ԱՄՆ պետքարտուղար Մարկո Ռուբիոն անխուսափելի ռազմական պատասխանի մասին հաղորդագրություններն անվանել է «կեղծ լուրեր»։ Սա ակնարկ է, որ Վաշինգտոնը դեռևս Մադուրոյի ռեժիմի հետ հակամարտության դիվանագիտական լուծման հույս ունի։