ԱՄՆ-ն կոչ է անում Հունգարիային և Սլովակիային հրաժարվել ռուսական գազից

Հունգարիան և Սլովակիան պետք է հրաժարվեն ռուսական գազից և ատոմային էներգիայից, հայտարարել է ԱՄՆ էներգետիկայի նախարարը:

Քրիս Ռայթը կոչ է արել եվրոպական այն երկրներին, որոնք դեռ գնում են ռուսական էներգակիրներ, չխոչընդոտել Եվրոպական միությանը՝ վերջ դնելու Մոսկվայից կախվածությանը և փոխարենը գնումներ կատարել Ամերիկայից:

Բրյուսելում կայացած միջոցառման ժամանակ Ռայթը հայտարարել է, որ Եվրոպայի համար ավելի նախընտրելի կլինի մատակարարումներ ստանալ «իրենց ընկերներից»:

Ի պատասխան Politico-ի հարցին՝ արդյո՞ք Հունգարիան և Սլովակիան վերջապես պետք է խզեն իրենց հարաբերությունները Կրեմլի հետ, Ռայթը պատասխանել է՝ «անկասկած»: «Մենք ցանկանում ենք ամերիկյանով փոխարինել ռուսական ամբողջ գազը: Նախագահ Թրամփը, Ամերիկան և ԵՄ բոլոր երկրները ցանկանում են վերջ դնել ռուս-ուկրաինական պատերազմին», - ասել է Ռայթը:

«Որքան շատ մենք կարողանանք սահմանափակել Ռուսաստանի՝ այս արյունահեղ պատերազմը ֆինանսավորելու հնարավորությունը, այնքան լավ կլինի բոլորիս համար: Այսպիսով, Ձեր հարցին պատասխանը բացարձակապես այո է»:

Միևնույն ժամանակ, Ռայթը կոչ է արել եվրոպական երկրներին գտնել ռուսական ատոմային էներգետիկայի այլընտրանքներ՝ հայտարարելով. «Մենք ցանկանում ենք, որ ատոմային տեխնոլոգիաները մատակարարվեն ԱՄՆ-ից կամ հենց ԵՄ-ից»: