ԱՄՆ-ն Գազայում միջազգային զորք տեղակայելու բանաձև է առաջարկում

Միացյալ Նահանգները հանդես է եկել Գազայի հատվածի ապագա կառավարման վերաբերյալ լայնածավալ նախաձեռնությամբ՝ ՄԱԿ-ի Անվտանգության խորհրդի քննարկմանը ներկայացնելով բանաձևի նախագիծ, որը նախատեսում է տարածաշրջանում միջազգային զորախմբի տեղակայում։ Այս մասին հայտնում է Axios-ը՝ վկայակոչելով իր ձեռքի տակ հայտնված փաստաթղթի նախագիծը, որը կարող է արմատապես փոխել ուժերի դասավորությունը տարածաշրջանում։

Փաստաթղթի համաձայն՝ նախատեսվում է «Միացյալ Նահանգներին և մասնակից այլ երկրներին տրամադրել լայն լիազորություններ՝ Գազայի հատվածը կառավարելու և անվտանգությունն ապահովելու համար առնվազն երկու տարի՝ մինչև 2027 թվականի վերջը, մանդատը երկարաձգելու հնարավորությամբ»։ Սա փաստացիորեն նշանակում է, որ տարածաշրջանի անվտանգային և վարչական կառավարումը երկարաժամկետ հեռանկարում կարող է անցնել միջազգային կոալիցիայի վերահսկողության տակ՝ Վաշինգտոնի գլխավոր դերակատարությամբ։

Բանաձևի նախագծով սահմանվում են միջազգային ուժերի հստակ խնդիրները։ Նրանք պատասխանատու կլինեն Գազայի՝ Իսրայելի և Եգիպտոսի հետ սահմանների անվտանգության ապահովման, քաղաքացիական բնակչության և մարդասիրական միջանցքների պաշտպանության համար։ Բացի այդ, զորախմբի առջև խնդիր կդրվի աջակցել և վերապատրաստել պաղեստինյան նոր ոստիկանական ուժերի, որոնք ապագայում պետք է ստանձնեն ներքին կարգուկանոնի պահպանումը՝ փոխարինելով ներկայիս ուժային կառույցներին։

Առաջարկվող մանդատի ամենակարևոր բաղադրիչներից մեկը լինելու է անկլավի ամբողջական ապառազմականացումը։ Միջազգային ուժերը պարտավոր կլինեն ոչնչացնել ռազմական ենթակառուցվածքները և կանխել դրանց հետագա վերականգնումը։ Սա ներառում է նաև տարածաշրջանում գործող զինված խմբավորումներից զենքի բռնագրավումը։ Այս կետը, ըստ էության, ուղղված է Գազայի հատվածում ռազմական գործողությունների վերսկսման ցանկացած հնարավորություն բացառելուն և անվտանգության նոր միջավայրի ձևավորմանը։

Ըստ աղբյուրների՝ Վաշինգտոնը մտադիր է փաստաթղթի քվեարկությանը հասնել առաջիկա շաբաթների ընթացքում։ Սպիտակ տան նպատակն է սկսել միջազգային ուժերի տեղափոխումը Գազայի հատված արդեն հունվարին։ Նման սեղմ ժամկետները վկայում են, որ ԱՄՆ-ը ձգտում է արագացնել իրավիճակի կայունացման գործընթացը և իր վերահսկողության տակ վերցնել հետպատերազմյան կարգավորումը։ Եթե բանաձևն ընդունվի, դա կդառնա վերջին տասնամյակների ամենանշանակալի միջամտությունը հակամարտության գոտում՝ Գազայի ապագան դնելով ուղիղ միջազգային կառավարման ներքո։