ԱՄՆ-ը չի վստահում ոչ մեկին Մերձավոր Արևելքում, ներառյալ՝ Իսրայելին․ Թոմ Բարաք

Սիրիայի հարցով ԱՄՆ հատուկ ներկայացուցիչ և Անկարայում դեսպան Թոմ Բարաքը հանդես է եկել մի շարք անսովոր կտրուկ և անսպասելի հայտարարություններով՝ անդրադառնալով Միացյալ Նահանգների քաղաքականության հակասություններին ու մարտահրավերներին Մերձավոր Արևելքում։ Նրա խոսքերը լույս են սփռում ԱՄՆ-ի և նրա առանցքային դաշնակից Իսրայելի միջև առկա բարդ և ոչ միանշանակ հարաբերությունների, ինչպես նաև տարածաշրջանային խաղացողների նկատմամբ խորը անվստահության վրա։

Իսրայելը հատուկ տեղ ունի Վաշինգտոնի համար, բայց մենք չենք վստահում նրան, գրեթե բառացի ասել է ամերիկացի դիվանագետը։ Թոմ Բարաքն ընդգծել է Իսրայելին տրամադրվող ԱՄՆ-ի հսկայական աջակցությունը՝ նշելով. «Մենք տարեկան 4-5 միլիարդ դոլարով սուբսիդավորում ենք Իսրայելին։ Իսրայելը հատուկ տեղ է զբաղեցնում Ամերիկայի սրտում»։ Սակայն այս «հատուկ հարաբերությունները» չեն նշանակում կույր վստահություն կամ շահերի լիակատար համընկնում։

Դիվանագետը խիստ քննադատաբար է արտահայտվել Իսրայելի վարչապետ Բենիամին Նեթանյահուի գործելաոճի մասին՝ նրան բնութագրելով որպես անկանխատեսելի և սահմաններ չճանաչող առաջնորդ։ «Նեթանյահուին չեն հուզում սահմանները՝ լինի դա կարմիր գիծ, կապույտ, թե կանաչ։ Եթե նա զգա, որ իր սահմանները կամ ժողովուրդը վտանգի տակ են, նա կգնա ցանկացած վայր և կանի այն ամենը, ինչ անհրաժեշտ համարի։ Վերջ»,- ասել է Բարաքը։

Այս համատեքստում նա բացահայտ խոստովանել է. «Ես չեմ վստահում ոչ մեկին Մերձավոր Արևելքում։ Մեր շահերը չեն համընկնում։ Ներառյալ Իսրայելին»։

Բարաքը նաև անդրադարձել է «Հեզբոլլահի» խնդրին և Լիբանանում ԱՄՆ-ի վարած քաղաքականությանը։ Նրա կարծիքով, «Հեզբոլլահը» զենքը վայր դնելու բացարձակապես ոչ մի դրդապատճառ չունի, հատկապես այն պայմաններում, երբ Իսրայելը շարունակում է իր ագրեսիվ գործողությունները։ «Իսրայելը հարձակվում է բոլորի վրա՝ Սիրիայի, Լիբանանի, Թունիսի»,- նշել է նա։

Այնուհետև ամերիկացի դիվանագետը մատնանշել է Վաշինգտոնի քաղաքականության տրամաբանական փակուղին. «Մենք զինում ենք լիբանանյան բանակին, որպեսզի նա զինաթափի «Հեզբոլլահին»։ Էլ ո՞ւմ դեմ պետք է նրանք կռվեն։ Չէ՞ որ մենք նրանց չենք զինելու Իսրայելի դեմ պատերազմելու համար, այնպես չէ՞։ Ստացվում է, որ դուք նրանց զինում եք իրենց իսկ ժողովրդի դեմ կռվելու համար»։